Hazarýaka ýurtlary deňizdäki gözlegler we brakonerlige garşy göreş boýunça ylalaşyklary taýýarlaýar
Şu hepde, 13-17-nji oktýabr aralygynda Aşgabatda Hazarýaka döwletleriň bilermenleriniň iş duşuşygy geçirildi. Azerbaýjanyň, Eýranyň, Gazagystanyň, Russiýanyň we Türkmenistanyň wekiliýetleri Hazarýaka sebitinde ekologik howpsuzlygyny we ylmy hyzmatdaşlygy berkitmäge gönükdirilen bäş taraplaýyn resminamalaryň taslamasyny ara alyp maslahatlaşdylar.
Esasy üns hyzmatdaşlygyň iki ugryna gönükdirildi. Ýurtlaryň Hökümetleriniň arasynda Hazar deňzinde deňiz ylmy gözleglerinde hyzmatdaşlyk hakyndaky Ylalaşygyň taslamasy ara alnyp maslahatlaşyldy. Suw biologiki serişdeleriň (brakonerlik) bikanun balyk tutulmagyna garşy göreş boýunça hyzmatdaşlygyň Teswirnamasynyň taslamasy gözden geçirildi. Bu Teswirnama 2010-njy ýylyň 18-nji noýabryndaky Hazar deňziniň howpsuzlygy hakyndaky Ylalaşygynyň üstüni ýetirer.
Duşuşyklara degişli ministrlikleriň we pudaglaýyn dolandyryş edaralaryň şeýle hem bilermenler merkezleriniň şol sanda Ylymlar akademiýasynyň we Hazar deňzi institutynyň wekilleri gatnaşdy.
Gatnaşanlar taslamalary ösdürmekde gazanylan üstünlikleri bellediler we bilelikdäki işleri dowam etdirmek barada ylalaşdylar.
Türkmenistan, Hazaryň biodürlüligini goramagyň işjeň tarapdary bolmak bilen häzirki wagtda Hazar deňziniň suw biologiki serişdelerini gorap saklamak we oýlanyşykly peýdalanmak boýunça toparyna ýolbaşçylyk edýär (2025–2026-njy ýyllar üçin).
BMG-niň Baş Assambleýasynyň 80-nji sessiýasynda ileri tutulýan garaýyşlarynda Türkmenistan sebitdäki tagallalarynyň uzak möhletleýin we strategiki häsiýetini görkezýän Hazar ekologik başlangyjyny işjeň ösdürmäge bolan maksadyny tassyklady.
Daşary ýurtly bilermenler gepleşikleriň ýokary derejede guralandygy üçin türkmen tarapyna minnetdarlyk bildirdiler.
ORIENT
