Raşid Meredow Malaýziýanyň we Ugandanyň daşary işler ministrleri bilen telefon arkaly söhbetdeşlik geçirdi
Türkmenistanyň daşary işler ministri Raşid Meredow anna güni, oktýabryň 17-sine, daşary ýurtly kärdeşleri - Malaýziýanyň daşary işler ministri Dato Seri Utama Haji Mohammad bin Haji Hasan hem-de Ugandanyň daşary işler ministri Jeje Odongo bilen telefon arkaly söhbetdeşlikler geçirdi.
Iki söhbetdeşligiň esasy temasy şu ýylyň dekabr aýynda Türkmenistanda geçiriljek Halkara Parahatçylyk we Ynanyşmak Forumyna taýýarlyk meseleleri boldy.
Malaýziýanyň daşary işler ministri bilen geçirilen gürrüňdeşlikde Meredow ikitaraplaýyn hyzmatdaşlygyň döwrebap meseleleri barada maslahatlaşdy. Diplomatlar syýasy, söwda-ykdysady hem-de medeni-ynsanperwer ugurlarda özara hyzmatdaşlygy ösdürmek, şeýle hem sebit we halkara düzümleriniň çäginde hereketleriň utgaşdyrylmagy barada pikir alyşdylar.
Ugandanyň daşary işler ministri bilen geçirilen telefon söhbetdeşligi hem ikitaraplaýyn hyzmatdaşlygyň ýagdaýyna we ösüş mümkinçiliklerine bagyşlanyldy. Diplomatlar esasan Birleşen Milletler Guramasynyň çäklerinde halkara derejedäki özara gatnaşyklaryň berkidilmegine üns berdiler.
Günorta-Gündogar Aziýa hem-de Afrika ýurtlarynyň hyzmatdaşlary bilen geçirilen gepleşikler Türkmenistanyň parahatçylyk başlangyçlarynyň giň halkara gyzyklanma döredýändigini görkezýär. Aşgabatda geçiriljek Parahatçylyk we Ynanyşmak Forumyna taýýarlyk meseleleriniň ara alnyp maslahatlaşylmagy bu forumyň bitaraplyk we konstruktiw dialog ýörelgelerini ilerletmekde möhüm halkara platforma hökmünde ähmiýetini tassyklaýar.
ORIENT
