Türkmenistanda sanly ykdysadyýeti ösdürmegiň 2026–2028-nji ýyllar üçin Konsepsiýasy tassyklanyldy
Ministrler Kabinetiniň Başlygynyň orunbasary Mämmethan Çakyýew sanly ykdysadyýeti ösdürmek boýunça alnyp barylýan işler barada hasabat berip, «Türkmenistanda 2026–2028-nji ýyllar üçin sanly ykdysadyýeti ösdürmegiň Konsepsiýasynyň» taslamasyny tassyklamak üçin hödürledi.
Prezident Serdar Berdimuhamedow degişli Karara gol çekip, elektron hökümet ulgamyny ösdürmegiň we sanly tehnologiýalaryň ornaşdyrylmagynyň milli ykdysadyýet üçin aýratyn ähmiýete eýedigini nygtady. Konsepsiýanyň baş maksady — innowasion tehnologiýalaryň giň gerimde ornaşdyrylmagy arkaly ýurdumyzyň dünýä derejesindäki bäsdeşlige ukyplylygyny ýokarlandyrmakdyr. Konsepsiýa ähli ulgamlaryň düýpli döwrebaplaşdyrylmagyny göz öňünde tutýar:
Infrastrukturanyň we döwlet dolandyryşynyň kämilleşdirilmegi: sanly infrastrukturany we «Elektron hökümet» ulgamyny ösdürmek arkaly döwlet edaralarynyň hem-de ykdysadyýetiň ähli pudaklarynyň işiniň netijeliligini ýokarlandyrmak.
Innowasiýalar: öňdebaryjy önümçilik tehnologiýalaryny ornaşdyrmak, halkara standartlara laýyklykda hukuk binýadyny kämilleşdirmek.
Durmuş ulgamy: sanly bilimi, ylymy, lukmançylygy we maliýe tehnologiýalaryny ösdürmek.
Hyzmatdaşlyk: halkara hyzmatdaşlygyny pugtalandyrmak, maýa goýumlary çekmek we maglumat alyş-çalyş ulgamyny kämilleşdirmek.
Şeýlelikde, 2026–2028-nji ýyllary öz içine alýan bu üçýyllyk meýilnamanyň tassyklanylmagy Türkmenistanyň sanly özgertmeleri dar ugurda däl-de, eýsem, döwlet derejesindäki strategik ugur hökmünde görýändigini we onuň ykdysady ösüşiň möhüm binýadydygyny tassyklaýar.
ORIENT
