Türkmenistanyň Özbegistan Respublikasyndaky Ilçihasynda brifing geçirildi
2025-nji ýylyň 30-njy sentýabrynda Türkmenistanyň Özbegistan Respublikasyndaky Ilçihanasynyň binasynda Türkmenistanyň Garaşsyzlygynyň 34 ýyllygyna, Halk Maslahatynyň nobatdaky geçirilen mejlisiniň jemlerine hem-de BMG-niň Deňze çykalgasy bolmadyk ösüp barýan döwletler boýunça üçünji maslahatyna bagyşlanyp brifing geçirildi.
Brifinge daşary ýurt Ilçihanalaryň, halkara guramalaryň, jemgyýetçilik guramalarynyň we köpçülikleýin habar beriş serişdeleriniň ýolbaşçylary we wekilleri hem-de Özbegistan Respublikasynda bilim alýan türkmen talyplary gatnaşdylar.
Brifingiň dowamynda Türkmenistanyň Özbegistan Respublikasyndaky Ilçisi Şadurdy Meredow, BMG-niň Özbegistan Respublikasyndaky Hemişelik utgaşdyryjysy Sabine Mahl hem-de Merkezi Aziýa Halkara institutynyň direktory Žawlon Wahabow çykyş etdiler.
Çykyşlarda Türkmenistanyň Prezidentiniň we Türkmen halkynyň Milli Lideriniň, Türkmenistanyň Halk Maslahatynyň Başlygynyň parasatly ýolbaşçylygynda Türkmenistan ýurdumyzyň Garaşsyzlyk ýyllarynda ýeten belent sepgitleri, Döwlet Baştutanymyz Serdar Berdimuhamedowyň BMG-niň Baş Assambleýasynyň 80-nji ýubileý sessiýasynda ýurdumyzyň alyp barýan parahatsöýüjülikli Bitaraplyk syýasatynynyň çäklerinde öňe süren halkara başlangyçlary, Halk Maslahatynyň mejlisinde beýan edilen netijeli teklipler hem-de BMG-niň Deňze çykalgasy bolmadyk ösüp barýan döwletler boýunça üçünji maslahatynyň jemleri barada beýan edildi.
Hususan-da, Türkmenistanyň Özbegistan Respublikasyndaky Ilçisi Ş.Meredow öz çykyşynda döwletimiziň hemişelik Bitaraplygynyň 30 ýyllyk baýramynyň taryhy ähmiýeti hem-de Halkara parahatçylyk we ynanyşmak ýylynda dünýäde hyzmatdaşlygy şeýle hem parahatçylygy pugtalandyrmak syýasatynyň ähmiýeti dogrusynda belledi.
Mundan başga-da BMG-niň Özbegistan Respublikasyndaky Hemişelik utgaşdyryjysy Sabine Mahl “Awaza” syýahatçylyk zolagynda geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatynyň çäklerinde 2024 — 2034-nji ýyllar üçin Hereketleriň Awaza maksatnamasynyň yglan edilmegi hem-de Awaza syýasy Jarnamasynyň kabul edilmeginiň aýratyn uly ähmiýetiniň bardygyny beýan etdi. Şeýle hem hanym Sabine Mahl türkmen tarapyna halkara giňişliginde alyp barýan işjeň hyzmatdaşlygy üçin çuňňur minnetdarlygyny bildirdi.
Şeýle-hem Merkezi Aziýa Halkara institutynyň direktory Žawlon Wahabow soňky ýyllarda Türkmenistan bilen Özbegistan Respublikasynyň arasyndaky strategiki hyzmatdaşlygyň hil taýdan täze derejä çykarylýandygyny aýratyn nygtady. Şunuň bilen baglylykda ol iki ýurduň döwlet Baştutanlarynyň tagallalary netijesinde türkmen-özbek dostluk gatnaşyklarynyň mundan beýläk hem gülläp ösmegini arzuw etdi.
Çäräniň ahyrynda gatnaşyjylara türkmen milli tagamlary hödür edildi.
