Türkmen wekiliýeti CADAP 7 maksatnamasynyň çäginde Ispaniýada tejribe alyşýar
2025-nji ýylyň 22–26-njy sentýabry aralygynda türkmen wekiliýeti Ispaniýa okuw saparyna gatnaşýar. Çäre Ýewropa Bileleşigi tarapyndan maliýeleşdirilýän CADAP 7 maksatnamasynyň goldawy bilen guralyp, Merkezi Aziýada neşe serişdelerine garşy göreşde hyzmatdaşlygy güýçlendirmäge gönükdirilýär.
Gazagystanyň, Gyrgyzystanyň, Täjigistanyň we Özbegistanyň wekilleri bilen bilelikde türkmen hünärmenleri Ispaniýanyň neşe serişdelerine bolan islegi azaltmak boýunça ylma esaslanýan strategiýalaryny ornaşdyrmakdaky öňdebaryjy tejribesini öwrenýärler. Bäş günüň dowamynda wekiller ispan syýasatçylary, tejribelileri we saglyk goraýyş işgärleri bilen duşuşyp, öňüni alyş, bejeriş we dikeldiş ugurlaryndaky innowasion çemeleşmeleri bilen tanyşýarlar.
Saparyň maksatnamasyna Ispaniýanyň Saglygy goraýyş ministrliginde duşuşyklar, Madrid şäherindäki «San-Isidro» penahanasyna we «Madroýo» göçme bölüminiň işine baryp görmek girýär. Asturiýa sebitinde wekiliýet ACDA Baglylyklary Bejeriş merkezine, «Proyecto Hombre Asturias» maksatnamasyna hem-de Owýedodaky neşe endiklerini bejeriş bölüminiň işine gatnaşýar. Mundan başga-da, gatnaşyjylar Terrorçylyga we guramaçylykly jenaýata garşy göreş boýunça Agtarma merkezinde (CITCO) boldular.
Bu okuw sapary tejribe alyşmak, institusional kuwwaty berkitmek we Merkezi Aziýa ýurtlary bilen olaryň ýewropaly hyzmatdaşlarynyň arasynda geljekde hyzmatdaşlygy ösdürmek üçin meýdança bolup hyzmat edýär. Alnan bilimler we amaly tejribe Türkmenistanda we tutuş sebitde psihotrop serişdelerine garşy milli strategiýalaryň kämilleşmegine ýardam berýär.
ORIENT
