DelivioTM mümkinçiliklerini giňeldýär: onlaýn tölegler indi Türkmenistanda
Iýmit eltip bermek hyzmaty DelivioTM täze funksiýany ornaşdyrmak bilen sanlylaşdyrmaga tarap möhüm ädim ätýär: sargytlary bank kartlary arkaly onlaýn tölemek mümkinçiligi. Bu täzelik ulanyjylar üçin amatlylygyny täze derejä çykarmagy, töleg prosesini tiz, ygtybarly we iň ýönekeý görnüşe getirmegi maksat edinýär.
DelivioTM platformasy indi giňeldilen mümkinçilikleri hödürleýär. Müşderiler sargytlaryny göni goşundy arkaly töläp bilýärler. Ilkinji tapgyrda ulgama Altyn Asyr töleg ulgamynyň kartlary, şol sanda Rysgal bank, Halkbank we Türkmenistan bank birikdirildi. Ýakyn wagtda Senagat banky we Türkmenistanyň Daşary ykdysady iş banky bilen integrasiýa edilmegine garaşylýar, bu bolsa ulanyjylaryň mümkinçiliklerini has-da giňelder.
Onlaýn tölegleriň ornaşdyrylmagy, döwrebap elektron hyzmatlary ösdürmäge gönükdirilen Türkmenistanyň milli sanlylaşdyrmak maksatnamasynyň möhüm bölegi bolup durýar. Bu ädim ýurdumyzyň ykdysadyýetiniň sanly transformasiýasyna hem-de raýatlar üçin amatly sanly infrastruktura döretmek boýunça döwletiň strategik ugruny görkezýär.
DelivioTM, onlaýn tölegiň diňe bir amatlylyk goşman, eýsem eltip bermek ulgamynda täze düzgüne öwrüljekdigine, döwrebaplygyň we sanly tehnologiýalara ynamyň nyşany boljakdygyna ynanýar. Hyzmat ulanyjylara diňe tagamy, tizligi we rahatlygy däl, eýsem dünýä ölçeglerine laýyk gelýän, ýurdumyzyň sanly strategiýasyna goşant goşýan tehnologik hyzmatlary hem hödürläp, ösüşini dowam etdirýär.
ORIENT
