Türkmenistanyň Lukmançylyk Uniwersitetinde mekdep okuwçylarynyň arasynda biologiýa dersi boýunça olimpiada geçirildi
17-nji sentýabrda Myrat Garryýew adyndaky Türkmenistanyň Döwlet lukmançylyk uniwersitetinde ýokary synp okuwçylarynyň arasynda biologiýa dersi boýunça olimpiada geçirildi. Türkmenistanyň Bilim ministrligi tarapyndan gurnalan we Garaşsyzlyk güni mynasybetli geçirilen bu çäre tebigy ylymlara höwesli zehinli ýaşlary ýüze çykarmaga hem-de goldamaga gönükdirildi.
Bäsleşigiň esasy maksady — milli bilim standartlaryny dünýä tejribeleri bilen utgaşdyrmak we okatmagyň hilini ýokarlandyrmakdyr. Olimpiada zehinli okuwçylary ýüze çykarmaga, olaryň biologiýa dersi boýunça bilimlerini giňeltmäge we geljekki hünär saýlamagyna ýardam etmäge gönükdirilýär. Şeýle hem bu çäre orta mekdepler bilen ýokary okuw mekdepleriniň arasyndaky hyzmatdaşlygy pugtalandyrmaga ýardam edýär.
Olimpiada iki tapgyrda geçirildi:
• Birinji tapgyr — welaýatlaryň, Aşgabat şäheriniň we Arkadag şäheriniň Baş bilim müdirlikleri tarapyndan geçirilen deslapky saýlama.
• Ikinji tapgyr — jemleýji bolup, ol Türkmenistanyň Lukmançylyk uniwersitetinde geçirildi.
Netijeler ýörite kompýuter programmasynyň kömegi bilen awtomatiki hasaplandy.
Olimpiadanyň ýeňijileri:
• I orun: Gyzylgül Muhammetnazarowa, Tejen etrabynyň ýöriteleşdirilen 33-nji orta mekdebiniň 12-nji synp okuwçysy.
• II orun: Aýlar Esenowa, Balkanabat şäheriniň ýöriteleşdirilen 20-nji orta mekdebiniň 11-nji synp okuwçysy, we Güljahan Atamyradowa, Babadaýhan etrabynyň ýöriteleşdirilen 15-nji orta mekdebiniň 11-nji synp okuwçysy.
• III orun: Annarejep Kakamyradow, Babadaýhan etrabynyň ýöriteleşdirilen 19-njy orta mekdebiniň 12-nji synp okuwçysy, Arzuw Seýitgulyýewa, Ýolöten etrabynyň ýöriteleşdirilen 40-njy orta mekdebiniň 12-nji synp okuwçysy, we Dültemmyrat Nurmyradow, Tejen etrabynyň ýöriteleşdirilen 33-nji orta mekdebiniň 12-nji synp okuwçysy.
Bäsleşigiň ýeňijilerine I, II we III derejeli diplomlar, ýokary netijeleri görkezenlere bolsa hormat hatlary we ýadygärlik sowgatlary gowşuryldy.
ORIENT
