Türkmenistanyň wekiliýeti Astanada geçirilen halkara seminara gatnaşdy
9–12-nji sentýabr aralygynda Türkmenistanyň Döwlet energetika institutynyň hem-de Ýagşygeldi Kakaýew adyndaky Halkara nebit we gaz uniwersitetiniň wekiliýeti iş sapary bilen Astana şäherinde bolup, dört günlük seminara gatnaşdy. Çäräniň esasy temasy durnukly ösüş meselelerine hem-de ekologiýa, durmuş we dolandyryş (ESG) ýörelgeleriniň bilim we ýokary hünär ulgamyna ornaşdyrylmagyna bagyşlandy.
Seminar Gazagystan Respublikasynyň Prezidentiniň ýanyndaky Döwlet dolandyryş akademiýasynda geçirildi. Ol «Merkezi Aziýada bilim we iş üpjünçiligi ulgamynda ekologiýa meselelerini, jemgyýetçilik zerurlyklaryny we dolandyryşyň netijeliligini birleşdirmek» (ESGCA) Erasmus+ halkara taslamasynyň çäginde guraldy.
Taslamanyň esasy maksady — sebitiň ýokary bilim ulgamyny ESG standartlary boýunça täze magistrlik maksatnamalaryny we okuwlary döretmek arkaly döwrebaplaşdyrmak.
Iş sessiýalarynyň dowamynda «ýaşyl geçiş», ekologiýa hasabatlylygy we daşky gurşawy goramak üçin häzirki zaman tehnologiýalary ýaly möhüm temalar ara alnyp maslahatlaşyldy. Çärä döwlet edaralarynyň, ylmy jemgyýetçiligiň we işewür toparlaryň wekilleri bilen birlikde 130-dan gowrak adam gatnaşdy.
Türkmenistanyň wekilleri maslahatlaşmalara işjeň gatnaşdylar. Bu bolsa ESG ýörelgeleriniň ýurdumyzyň ýokary okuw mekdepleriniň okuw maksatnamalaryna ornaşdyrylmagynyň ähmiýetini açyp görkezdi. Saparyň dowamynda Ýewropa hyzmatdaşlary bilen hyzmatdaşlygy pugtalandyrmak we durnukly ösüş uguryndaky täze mümkinçilikleri açmak mümkin boldy.
ORIENT
