Aşgabatda Dünýä türkmenleriniň ynsanperwer birleşiginiň XXVI maslahaty geçirildi
13-nji sentýabrda, şenbe güni Türkmenistanyň Jemgyýetçilik guramalarynyň merkezinde Dünýä türkmenleriniň ynsanperwer birleşiginiň XXVI maslahaty geçirildi. Foruma daşary döwletleriň birnäçesinde kowçum bolup ýaşaýan türkmenleriň wekilleri hem-de ýurduň dürli künjeklerinden gelen wekiliýet toparlary gatnaşdylar.
Türkmenistanyň Prezidenti Serdar Berdimuhamedow gatnaşyjylaryna iberen Gutlagynda Halkara parahatçylyk we ynanyşmak ýylynda Garaşsyzlyk gününiň öňüsyrasynda geçirilýän bu duşuşygyň simwoliki ähmiýetini belledi. Döwlet Baştutanynyň belleýşi ýaly, Dünýä türkmenleriniň ynsanperwer birleşigi watandaşlarymyz bilen gatnaşyklary berkitmekde hem-de bitaraplyk we ynsanperwer ýörelgelerini halkara giňişliginde wagyz etmekde möhüm orny eýeleýär.
Birleşik 27 sany daşary ýurtdaky şahamçalary birleşdirýär. Olar medeni çäreleri we ynsanperwer başlangyçlary gurnaýarlar. Şeýlelik bilen, 2025-nji ýylda BAE-de “Türkmenistan – Parahatçylygyň we ynanyşmagyň watany” atly maslahat geçirildi we Owganystandaky Magtymguly Pyragy adyndaky medeni jemgyýeti dostluk çäresini geçirdi.
Aşgabatda geçirlen mejlisiň dowamynda wekiliýetler guramanyň işiniň ileri tutulýan ugurlaryny, şol sanda medeni-ynsanperwer gatnaşyklary goldamak, milli mirasy wagyz etmek we kowçum bolup ýaşaýan türkmenleriň arasyndaky özara gatnaşyklary ara alyp maslahatlaşdylar. Maslahatyň jemleri boýunça Dünýä türkmenleriniň ynsanperwer birleşiginiň birnäçe işjeň agzasyna hormatly hatlary gowşuryldy.
Dünýä türkmenleriniň ynsanperwer birleşigi Türkmenistanyň içerki syýatyny bilen onuň halkara abraýyny baglanyşdyrýan diplomatiýanyň “ýumşak kanaly” hökmünde çykyş edýär. Medeni çäreler we kowçum bolup ýaşaýan türkmenleriň wekilleri bilen işlemek arkaly döwlet bitaraplyk, ynsanperwerlik we parahatçylyk ýörelgelerine ygrarlylyk gymmatlyklaryny ýaýradýar we daşary ýurtlarda ýurduň oňyn keşbini emele getirýär.
ORIENT
