Aşgabatda kämil tehnologiýaly 700 sany täze «Yutong» awtobuslary hyzmat edip başlar
Aşgabat şäherine döwrebap, kämil enjamlar bilen üpjün edilen täze 700-sany «Yutong» awtobuslaryň uly tapgyry gelip gowuşdy. Ýurdumyza getirilen uzynlygy 12 metr bolan «Yutong» kysymly awtobuslaryň hereketlendirijisi ekologik häsiýetli Ýewro 5 ölçeglerine laýyk gelýär.
Ulag hyzmaty üçin töleg geçirilişi sanly ulgam arkaly üpjün edilen bu täze awtobuslaryň döwrebaplygy, rahatlygy we ýene-de birnäçe ajaýyp oňaýlyklary raýatlarda ýakymly täsirleri galdyryp, oňat seslenmeleri döretdi. Bu ulgam ýerli bank kartlary, QR-kod we kagyz petekler arkaly işleýär. Awtobusyň hereketiniň tizligini dolandyryjy awtomatik ulgam hereket edýär.
Tomus paslynyň ýurdumyzdaky aýratynlygy bolan yssy howa şertleri göz öňünde tutulyp, täze ulagda ýolagçylaryň oňaýlylygy üçin sowadyjy enjamyň işledilmegi hem gurnalandyr. "CarLog" programmasynyň üsti bilen dolandyryşyň merkezi displeýi hem-de GPS ulgamy we gurnalan wideokameralaryň 10-synyň kömegi bilen wideogözegçilik ulgamy arkaly awtobusyň hereketine we sürüjiniň işine gözegçilik etmek üçin ornaşdyrylan häzirki zaman Intellektual ulgamy bar. Täze awtobusda ses we şekil ulgamyna degişli enjamlar hem bar.
Soňky ýyllarda dünýä belli kompaniýalar bilen baglaşylan şertnamalara laýyklykda, awtoulag serişdeleriniň köp ýüzlerçesi satyn alyndy. Ýurdumyza getirilen bu täze awtobuslar hem bildirilýän talaplara laýyklyk derejesini tassyklaýar, şoňa görä-de, olar degişli ugurlar boýunça hyzmat etmek üçin peýdalanylar.
ORIENT
