Türkmenistandan Kabula ynsanperwerlik kömegi bardy
Türkmenistanyň paýtagtynyň Halkara howa menzilinden Owganystanyň ýertitremeden ejir çeken çagalaryna we ýaşaýjylaryna ynsanperwerlik kömegi ugradyldy. Ynsanperwerlik kömegi Prezidenti Serdar Berdimuhamedowyň gol çeken degişli Buýrugyna laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan iberildi.
“Türkmenhowaýollary” döwlet gullugynyň ýük uçary ýörite uçuşy amala aşyryp, anna güni Kabula dokma, azyk önümleri, egin-eşikler hem-de durmuşda zerur bolan beýleki önümleri eltdi.
Owganystanda ynsanperwerlik ýüküni kabul etmek çäresi ýakymly pursatlara beslendi. Oňa gatnaşyjylar yzygiderli kömek-goldaw berýändigi üçin türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa we Prezident Serdar Berdimuhamedowa alkyşlaryny beýan etdiler. Bellenilişi ýaly, Türkmenistanyň berýän kömek-goldawlary, edýän hemaýaty hoşniýetli goňşuçylyk gatnaşyklarynyň hil taýdan täze derejä çykmagyny şertlendirýär. Munuň özi iki goňşy ýurduň arasynda ýola goýulýan hyzmatdaşlygyň ähli ugurlar boýunça ösdürilýändigini alamatlandyrýar.
ORIENT
