Türkmenistanyň Prezidenti Özbegistan Respublikasynyň Prezidentini gutlady
Hormatly Prezidentimiz Serdar Berdimuhamedow Türkmenistanyň halkynyň we Hökümetiniň adyndan, şeýle hem hut öz adyndan Özbegistan Respublikasynyň Prezidenti Şawkat Mirziýoýewe we ýurduň ähli doganlyk halkyna Özbegistan Respublikasynyň Garaşsyzlyk güni mynasybetli tüýs ýürekden gutlaglaryny, iň gowy arzuwlaryny iberdi.
“Häzirki döwürde Özbegistan Respublikasy syýasy, durmuş-ykdysady we beýleki ugurlarda öňegidişlik hem-de gülläp ösüş ýoly bilen ynamly öňe barýar. Biz ýakyn goňşymyzyň gazanýan üstünliklerine begenýäris” diýip, döwlet Baştutanymyz hatynda belledi. Hormatly Prezidentimiz Türkmenistan bilen Özbegistan Respublikasynyň arasyndaky häzirki ikitaraplaýyn gatnaşyklaryň oňyn hem-de durnukly häsiýete eýedigini we hyzmatdaşlygyň giň gerimli ugurlar boýunça ösdürilýändigini kanagatlanma bilen nygtap, türkmen-özbek gatnaşyklarynyň bilelikdäki tagallalar netijesinde iki halkyň bähbidine mundan beýläk-de çuňlaşdyryljakdygyna berk ynam bildirdi.
Döwlet Baştutanymyz ýakymly mümkinçilikden peýdalanyp, Prezident Şawkat Mirziýoýewe berk jan saglyk, bagtyýarlyk, jogapkärli döwlet işinde uly üstünlikleri, Özbegistan Respublikasynyň doganlyk halkyna bolsa parahatçylyk, abadançylyk hem-de gülläp ösüş arzuw etdi.
ORIENT
