Osakada Türkmenistanyň syýahatçylygyna bagyşlanan halkara maslahat geçirildi
2025-nji ýylyň 29-njy awgustynda Osakada, «EKSPO-2025» Bütindünýä sergisindäki Türkmenistanyň milli pawilýonynda ýurdumyzyň syýahatçylyk pudagynyň ösüşine bagyşlanan «Türkmenistan — dostlugyň we myhmansöýerligiň ýurdy» atly halkara maslahaty geçirildi. Çäre gibrid görnüşinde geçirildi.
Maslahatda Türkmenistanyň we Ýaponiýanyň syýahatçylyk ulgamyndaky hyzmatdaşlygynyň geljegi, hususy pudagyň ikitaraplaýyn gatnaşyklary berkitmekdäki orny we mümkinçilikleri ara alnyp maslahatlaşyldy.
Wideoaragatnaşyk arkaly gutlag sözi bilen Türkmenistanyň Söwda we daşary ykdysady aragatnaşyklar ministriniň orunbasary Kerimberdi Gurbanow çykyş etdi. Şeýle hem Türkmenistanyň Medeniýet ministriniň orunbasary Nursähet Şirimow, Medeniýet ministrliginiň Syýahatçylyk müdirliginiň başlygynyň orunbasary Gülşat Bakyýewa, «Eşretli syýahat» hojalyk jemgyýetiniň direktory Sähra Amanowa we Türkmenistanyň hususy syýahatçylyk agentlikleriniň beýleki wekilleri öz çykyşlaryny etdiler.
Daşary ýurtlardan gatnaşanlaryň arasynda All Seasons Travel Co. ýapon kompaniýasynyň dolandyryjy direktory Kuniýosi Takada hem çykyş etdi. Çäräniň maksatnamasyna «Türkmenistan — dostlugyň we myhmansöýerligiň ýurdy» atly wideoşekiliň görkezilmegi we syýahatçylyk pudagynyň wekilleriniň ikitaraplaýyn duşuşyklary girizildi.
Maslahata şeýle hem Ýaponiýanyň syýahatçylyk kompaniýalarynyň wekilleri gatnaşdy. Olaryň arasynda Asia Trading Co.,Ltd, Saiyu Travel (Ýuko Masumoto), Silkroad Travel (Hisahiro Sasaka), şeýle-de World Air-Sea Service Co.Ltd kompaniýalary boldy.
ORIENT
