Türkmenistanyň we Özbegistanyň arasynda göni howa gatnawlaryny gaýtadan dikeltmek meýilleşdirilýär
Özbegistan bilen Türkmenistan göni howa gatnawlaryny dikeltmek barada ylalaşyk gazandy. Bu barada «Özbegistan 24» teleýaýlymyna beren interwýusynda ulag ministri Ilhom Mahkamow habar berdi.
22-nji awgustda Türkmenistanda ýerleşýän «Awaza» milli syýahatçylyk zolagynda Özbegistanyň Prezidenti Şawkat Mirziýoýewiň, Türkmenistanyň Halk Maslahatynyň Başlygy Gurbanguly Berdimuhamedowyň we Azerbaýjanyň Prezidenti Ilham Aliýewiň gatnaşmagynda üç taraplaýyn duşuşyk geçirildi.
Liderleriň gatnaşmagynda birnäçe resminama gol çekildi, şolaryň hatarynda raýat awiasiýasy ulgamynda hyzmatdaşlygy ösdürmek hakyndaky beýannama hem bar. Bu resminama Özbegistanyň ulag ministri Ilhom Mahkamow bilen «Türkmenhowaýollary» (Turkmenistan Airlines) döwlet gullugynyň başlygy Dowran Saburow tarapyndan gol çekildi.
Özbegistanyň ulag ministriniň sözlerine görä, bu resminama geljekde göni howa gatnawlaryny ýola goýmak üçin mümkinçilik döredýär. «Häzirki wagtda Türkmenistan bilen göni howa gatnawlary ýok. Şu gün biz resminama gol çekdik… ýakyn wagtda ýurtlaryň arasynda ikitaraplaýyn howa gatnawlaryny ýola goýmak mümkinçiligi peýda bolar» - diýip, Mahkamowyň sözlerini Gazeta.uz getirýär.
