Hytaýly toty guşy Ginnessiň rekordlar kitabyna girizildi
Hytaýyň Henan welaýatynda Sýaoguý lakamly toty guşy reňkleri tanamak boýunça dünýä rekordyny goýup, Ginnessiň rekordlar kitabyna girizildi. Bu barada Guinness World Records-a salgylanyp, Kazinform habar berýär.
Synag üçin düşbije guşuň öňünde 10 plastik konteýner hem-de şol sanda degişli reňkdäki sypal topjagazlar ýerleşdirildi. Her bir topjagaz gerekli reňkdäki konteýnere salynmalydy.
Topjagazlaryň tertibi bilgeşleýin garyşdyrylyp, bu hem ýumuşy has-da kynlaşdyrdy. Muňa garamazdan, toty guşy usulyýet bilen çyzyk boýunça hereket edip, her bir topjagazy galdyryp, ony dogry konteýnere eltýärdi. Sýaoguýyň biri-birine ýakyn bolan gülgüne reňkleri tapawutlandyryp bilmegi aýratyn täsin boldy.
Netijede, özboluşly bu guşjagaz öz eýesi Sin Feniň ýolbaşçylygynda 10 dürli reňki tapawutlandyryp hem-de 33,50 sekundyň dowamynda reňkli topjagazlary dogry tertipde ýerleşdirip bildi.
Sin Fen toty guşa ilkinji gezek 2020-nji ýylda duşandygyny gürrüň berdi. Şol wagt ol entek guş çagasy bolup, elden iýmitlenmäge mätäçdi. Şol döwürden bäri olaryň arasynda berk aragatnaşyk döredi. Guşjagazyň oýnawaçlara, esasan hem, dürli reňkdäki topjagazlara bolan gyzyklanmasyny görüp, eýesi oňa reňkleri tanamagy we görnüşlere görä bölmegi öwredip başlady.
