Okuw ýylynyň jemleri we özgertmeler: Ahal welaýatynda bilim işgärleriniň maslahaty geçirildi
Änew şäheriniň Medeniýet öýünde Ahal welaýatynyň öňdebaryjy mugallymlarynyň «Halkara parahatçylyk we ynanyşmak ýyly» şygary astynda awgust maslahaty geçirildi. Welaýatyň Baş bilim müdirligi tarapyndan gurnalan çärä mekdepleriň ýolbaşçylary, mugallymlary hem-de ýerli häkimiýet edaralarynyň wekilleri gatnaşdy. Bu barada Türkmenistanyň Bilim ministrliginiň resmi saýtynda habar berilýär.
Maslahata gatnaşyjylar 2024–2025-nji okuw ýylynyň jemlerini ara alyp maslahatlaşyp, 2025–2026-njy ýyl üçin möhüm wezipeleri kesgitlediler. Sanly tehnologiýalary ornaşdyrmak, okatmagyň innowasion usullaryndan peýdalanmak we mugallymlaryň hünär derejelerini kämilleşdirmek meselelerine aýratyn üns berildi. Çykyş edenler bilim ulgamyndaky özgertmeleriň hemmetaraplaýyn ösen hem-de intellektual ýaş nesli taýýarlamaga gönükdirilendigini nygtadylar.
Maslahatyň çäklerinde okuw-usuly gollanmalaryň sergisi guraldy. Çäräniň ahyrynda geçen okuw ýylynda ýokary netijelere eýe bolan mugallymlar Hormat hatlary we gymmat bahaly sowgatlar bilen sylaglandy.
ORIENT
