Türkmenistanyň Ilçisi Täze Zelandiýada ilkinji gezek akkreditirlendi
Wellington, Täze Zelandiýa. 16-njy iýul | ORIENT. Şu gün Wellington şäherindäki Hökümet öýünde Täze Zelandiýanyň General-gubernatory Sindi Kiro ynanç hatynyň gowşuryş dabarasy geçirildi. Dabaranyň dowamynda Türkmenistanyň Täze Zelandiýadaky ilkinji Adatdan daşary we Doly ygtyýarly Ilçisi Atadurdy Baýramow resmi taýdan akkreditirlendi.
Bu waka, Türkmenistan bilen Täze Zelandiýanyň arasyndaky hyzmatdaşlyk üçin täze gözýetimleri açyp, ikitaraplaýyn gatnaşyklaryň ösmeginde möhüm tapgyry alamatlandyrýar. Ilçiniň bellenilmegi Türkmenistanyň diplomatik gatnaşygyny giňeltmek we ýurduň halkara gatnaşyklaryny pugtalandyrmak boýunça maksada okgunly syýasatynyň bir bölegidir.
Degişli Permana 2025-nji ýylyň 27-nji aprelinde Türkmenistanyň Prezidenti Serdar Berdimuhamedow gol çekdi. Bu Permana laýyklykda Türkmenistanyň Ýaponiýadaky (Tokio şäheri) Adatdan daşary we Doly ygtyýarly ilçisi Atadurdy Baýramow, şol bir wagtda, Türkmenistanyň Täze Zelandiýadaky Adatdan daşary we Doly ygtyýarly Ilçisi wezipesine bellendi.
Mikroneziýa Federatiw Ştatlary bilen bir hatarda Türkmenistan ilkinji gezek ýuwaş ummany sebitinde ýerleşýän bu döwlete özüniň ynanç hatyny gowşuran ýurtlarynyň hataryna goşuldy. Bu gün Sindi Kiro Solomon adalarynyň Ýokary komissaryndan, Polşanyň Ilçisinden, Türkiýäniň Ilçisinden we Maldiw adalarynyň Ýokary komissaryndan ynanç hatlaryny kabul etdi.
Dabara diňe bir diplomatik protokoly däl, eýsem Täze Zelandiýanyň baý medeni mirasynyň görnüşlerini hem öz içine aldy. Olaryň arasynda – burunlaryň we maňlaýlaryň degişmegi bilen ýaşaýyş deminiň alyş-çalşyny alamatlandyrýan maori dessury bolan adaty hongi salamy bardy.
Ýerli halklaryň wekilleriň kabul edişlige gatnaşmagy Täze Zelandiýanyň däp-dessurlaryna çuňňur hormat goýýandyklaryny we olaryň resmi çärelere goşulandygyny aýdyň görkezdi. Ilçi Atadurdy Baýramow, beýleki täze bellenen diplomatik missiýanyň ýolbaşçylary bilen bir hatarda, däp-dessurlara we medeni taýdan birek-birege hormat goýmagy alamatlandyrýan protokolyň bu medeni görnüşine gatnaşmaga mümkinçilik aldy.
