NVIDIA dünýäde maýalaşdyrmasy $4 trilliondan geçen ilkinji kompaniýa boldy
Amerikan grafiki prosessor öndürijisi NVIDIA taryhy derejesine ýetdi: onuň maýalaşdyrmasy ilkinji gezek $4 trilliondan geçdi we dünýäde şeýle bazar bahasyna ýeten ilkinji kompaniýa boldy.
TradingView hyzmatynyň maglumatlaryna görä, NVIDIA häzirki wagtda dünýäniň iň gymmat jemgyýetçilik kompaniýalarynyň sanawynda ilkinji orunda durýar. Çarşenbe güni, 9-njy iýulda, Amerikanyň NASDAQ biržasyna laýyklykda NVIDIA-nyň (NVDA) paýnamalarynyň bahasy 2,76% ýokarlanyp, $164,41-a ýetdi.
Bu bolsa çip öndürijiniň bazar bahasynyň $4,02 trilliona ýetmegine sebäp boldy. Maýalaşdyrma boýunça ikinji orunda Microsoft (MSFT) $3,74 trillion bilen, üçünji orunda bolsa Apple (AAPL) $3,13 trillion bilen ýerleşýär. LSEG-iň maglumatlaryna görä, NVIDIA-nyň bahasy Kanadanyň we Meksikanyň gazna bazarlarynyň jemi bahasyndan, şeýle hem Beýik Britaniýadaky ähli jemgyýetçilik kompaniýalaryň jemi gymmatyndan ýokarydyr.
Reuters habarlar gullugynyň bellemegine görä, dünýäde emeli aň tehnologiýalaryna dowam edýän gyzyklanma sebäpli öňdebaryjy çip öndürijiniň paýnamalaryna bolan isleg ep-esli ýokarlandy. Kompaniýanyň paýnamalary aprel aýyndaky pes derejeler bilen deňeşdirilende takmynan 74% ýokarlandy. Şol döwürde dünýä bazarlaryna ABŞ-nyň prezidenti Donald Tramp tarapyndan girizilen import tölegleri agyr täsir etdi. Şeýle-de bolsa, soňky döwürde ABŞ bilen onuň söwda hyzmatdaşlarynyň arasynda gazanylan söwda ylalaşyklaryna bolan oňaýly garaýyş NVIDIA-nyň paýnamalarynyň bahasynyň ýokarlanmagyna goşant goşdy.
Soňky dört ýylyň dowamynda NVIDIA-nyň bazar bahasy takmynan sekiz esse ýokarlandy: 2021-nji ýylda $500 milliarddan häzirki wagtda $4 trilliona ýetdi. Kompaniýanyň maýalaşdyrmasy ilkinji gezek 2023-nji ýylyň maýynda $1 trilliona ýetdi, 2024-nji ýylyň fewralynda $2 trilliondan geçdi, 2024-nji ýylyň iýunynda bolsa ilkinji gezek $3 trilliondan ýokary boldy.
Şu ýylyň başyndan bäri kompaniýanyň paýnamalarynyň bahasy takmynan 20% ýokarlandy. NVIDIA-nyň bazar gymmatynyň beýle çalt ösmegi, onuň çipleriniň emeli aň tehnologiýasynyň ösüşinde esasy orun eýeleýändigine Wall Street-iň ýokary ynamynyň bardygyny görkezýär diýip, Reuters belleýär. Kompaniýa 2-nji çärýekde girdejisiniň 2% ýalňyşlyk bilen $45 milliard boljakdygyny çaklaýar. 2-nji çärýek boýunça maliýe hasabaty 27-nji awgustda çap ediler.
ORIENT
