Ýewropaly LEO-PNT: Geljegiň nawigasion ulgamy
Rocket Lab kompaniýasy Ýewropa kosmos agentligi (ESA) bilen täze pes orbitadaky LEO-PNT nawigasion ulgamy üçin iki sany kiçi hemrany uçurmak barada şertnama baglaşandygyny yglan etdi. Bu taslama, häzirki wagtda esasan geostasionar we orta orbitadaky hemralary ulanýan GPS, Galileo, ГЛОНАСС we Beidou ýaly bar bolan global nawigasion ulgamlaryndan tapawutlylykda, pes ýer orbitasyna ýerleşdiriljek hemralary döretmegi maksat edinýär.
GMV we Thales Alenia Space tarapyndan taýýarlanan LEO-PNT Pathfinder A hemralarynyň 2025-nji ýylyň ahyryna çenli Täze Zelandiýadan Electron raketasy bilen 510 km beýiklikdäki orbita uçurylmagy meýilleşdirilýär. Agramy 20-30 kg aralygyndaky bu hemralar alty aýdan gowrak işläp, esasy nawigasion tehnologiýalarynyň görkezilmegini üpjün eder hem-de ESA-nyň Halkara elektrik aragatnaşyk birleşiginde (ITU) ýazgy edilen ýygylyklary 2026-njy ýylyň baharyna çenli saklamagyna mümkinçilik berer.
ESA Rocket Lab kompaniýasyny çaltlyk zerurlygy we Ýewropa tarapyndan laýyk raketa bolmazlygy sebäpli saýlady – uly raketalar artykmaçdy, kiçijik Ýewropa raketalary bolsa entek orbitada üstünlikli uçuş geçirip görmedi. Bu ýagdaý Rocket Lab kompaniýasyny kiçi ýükleri çalt wagtda uçurmakda ygtybarly hyzmatdaş hökmünde nobatdaky gezek görkezdi.
Görkeziliş maksatly Pathfinder A hemralaryndan soň, 2027-nji ýyla çenli has uly sekiz sany Pathfinder B hemrasy uçurylar. Netijede, takmynan 300 hemradan ybarat topar Ýewropanyň Galileo ulgamynyñ üstüni dolar. Pes orbitadaky nawigasion ulgamlarynyň has güýçli we päsgelçilige durnukly signal, goşmaça peýdaly ýük ýerleşdirmek mümkinçiligi ýaly artykmaçlyklary bar. Emma bu ulgamlaryň dünýä derejesinde doly ýaýramak we ýokary takyklyk üçin has kän hemra we güýçli bort kompýuterlerini talap edýändigini hem bellemek gerek.
ORIENT
