Şanhaý kinofestiwaly: emeli aň animasiýasyndan nusgawy kung-fu eserleriniñ täzeden janlanmagyna çenli
Şanhaý kinofestiwalynyň çäklerinde kinematografiýany özgertmek üçin emeli aň tehnologiýasyny ulanýan iki uly taslama hödürlenildi. Olaryň birinjisi — bary-ýogy 30 adam tarapyndan Quantum Animation atly emeli aň guralynyň kömegi bilen döredilen doly göwrümli «A Better Tomorrow: Cyber Border» animasion filmidir. Bu tehnologiýa film döredilişiniň esasy tapgyrlaryny öz üstüne alýar — sýužetden we animasiýadan ses sintezine çenli, bu bolsa öndüriliş wagtyny ep-esli gysgaldýar.
Ikinji taslama — ýüz sany söweş sungaty baradaky nusgawy filmleriň giň göwrümli dikeldilmegi. Emeli göziýetim we neýron ulgam tehnologiýalary arkaly surat we ses hilini ýokarlandyrmak, reňkleri dikeltmek we artykmaç sesleri aradan aýyrmak işleri alnyp barylýar. Ilkinji onluga «Serhoş ussat» we «Gahar ýumrugy» ýaly meşhur filmler girizildi.
Bu başlangyçlaryň maksady diňe bir nusgawy eserleri täzelemek däl-de, eýsem, bu žanryň töwereginde täze media ekoulgamyny döredip, köne filmleri oýunlarda, anime we teleseriallarda täzeden janlandyrmaga mümkinçilik bermekdir. Döredijiler emeli aňyň adamyň ornuny tutmaýandygyny, eýsem döredijilik işiniň tizligini ýokarlandyryp, gündelik işleri awtomatlaşdyrýandygyny nygtaýarlar. Bu ugurda hünärmenleri taýýarlamak üçin Şanhaýda ylmy-barlag merkezi açyldy, hökümet bolsa emeli aň arkaly döredilen materiallary hökmany bellik etmek düzgüni girizdi. Bu çäre maglumat howpsuzlygyny üpjün etmek maksadyny göz öňünde tutýar.
ORIENT
