Aşgabat – London: Beýik Britaniýanyň DIM-niň orunbasary bilen telefon arkaly söhbetdeşlik geçirildi
Şu gün Türkmenistanyň Daşary işler ministriniň orunbasary Ahmet Gurbanow bilen Birleşen Patyşalygyň Ýewropa, Demirgazyk Amerika we deňziň aňyrsyndaky ýurtlar boýunça döwlet ministri Stiwen Dautiniň arasynda telefon arkaly söhbetdeşlik boldy.
Britan tarapynyň Türkmenistanyň ýolbaşçylygyna Birleşen Patyşalygynyň raýatlaryny Eýrandan ewakuasiýa etmekde beren ýardamy üçin minnetdarlyk bildirmegi söhbetdeşligiň esasy pursady boldy. Bu hereketler Ýakyn Gündogarda emele gelen kyn ýagdaýyň çäginde amala aşyryldy. Bellenilişi ýaly, bu Türkmenistanyň ynsanperwer ýörelgelerine ygrarlydygyny ýene bir gezek görkezdi.
Diplomatlar ynsanperwerlik meselelerinden başga-da, Türkmenistan bilen Beýik Britaniýanyň arasyndaky syýasy-diplomatik we söwda-ykdysady ulgamlardaky hyzmatdaşlygyň häzirki ýagdaýyny we geljegini ara alyp maslahatlaşdylar diýip, Türkmenistanyň DIM-niň metbugat gullugynda habar berildi.
Şu ýylyň mart aýynda Aşgabatda geçirilen “Türkmenistanyň geljegine maýa goýum” (IFT-2025) atly halkara foruma Beýik Britaniýanyň hususy pudagynyň wekilleriniň gatnaşmagynyň netijeliligi bellendi. Bu daşary ýurtly işewürleriň Türkmenistanyň ykdysady mümkinçiliklerine bolan gyzyklanmasynyň artýandygyny görkezýär.
Söhbetdeşligiň dowamynda häzirki sebitleýin meseleler şeýle hem şu ýylyň ikinji ýarymynda meýilleşdirilýän ikitaraplaýyn we köptaraplaýyn görnüşde meýilleşdirilen çäreler ara alnyp maslahatlaşyldy. Iki ýurduň daşary syýasat edaralarynyň arasynda yzygiderli dialogy alyp barmagyň ähmiýeti nygaldy. Munuň özi tagallalary utgaşdyrmak we hyzmatdaşlygy ösdürmek üçin esas bolup durýar.
Söhbetdeşligiň ahyrynda britan tarapy Türkmenistana Birleşen Patyşalygyň raýatlaryna berlen ynsanperwer ýardamy üçin ýene-de bir gezek hoşallyk bildirdi.
ORIENT
