Aşgabat Ýakyn Gündogardaky ýagdaý sebäpli öz ugurlaryny üýtgetmäge mejbur bolan howa gämilerini kabul etdi
Türkmenistanyň Daşary işler ministrligi häzirki wagtda Ýakyn Gündogarda dartgynlylygyň güýjemegi bilen bagly ynsanperwer goldawyny bermek boýunça gyssagly çäreleri barada habar berdi. Halkara ynsanperwer ýörelgelerine şeýle hem hemişelik oňyn bitaraplyk derejesine ygrarlydygyny görkezýän Türkmenistan, öz ugurlaryny üýtgetmäge mejbur bolan daşary ýurt awiakompaniýalarynyň ähli howa gämileri tarapyndan ýurduň howa giňişliginden päsgelçiliksiz peýdalanmak üçin şertleri tizden-tiz üpjün etdi.
FlyDubai (BAE), Jazeera Airways (Kuweýt), S7Airlines (RF) we beýleki awiakompaniýalaryň uçarlaryna Aşgabadyň Halkara howa menziline gonmaga dessin mümkinçilik döredildi. Bu uçarlaryň içinde Merkezi Aziýa ýurtlarynyň, Ýakyn Gündogaryň, Hindistanyň, Russiýanyň we başga-da birnäçe döwletleriň ýüzlerçe raýatlary bardy.
Ýolagçylaryň ählisi üç wagtyna gyzgyn nahar hem-de lukmançylyk hyzmatlaryna elýeterlik bilen üpjün edildi. Howa gämileriniň ekipažlarynyň agzalaryna halkara raýat awiasiýasynyň kadalaryna laýyklykda talabalaýyk dynç almak üçin şertler döredildi.
Bu dessin berlen kömek, Türkmenistan ynsanperwer meselelerinde özüniň mäkäm garaýyşyny iş ýüzünde tassyklaýar hem-de çylşyrymly halkara ýagdaýlarynda raýdaşlyk we adamkärçilik ýörelgeleriniň iş ýüzünde durmuşa geçirilmegini nygtaýar.
14-nji iýunda Birleşen Arap Emirlikleriniň Türkmenistandaky Ilçisi Ahmed Al-Haý Hamad Hamis Al-Hameli Türkmenistanyň Prezidentiniň şeýle hem türkmen halkynyň Milli Lideri, Türkmenistanyň Halk Maslahatynyň Başlygynyň adyna minnetdarlyk hatyny iberdi diýip, Türkmenistanyň DIM-i habar berdi.
Hatda BAE-niň Hökümetiniň adyndan çuňňur minnetdarlyk bildirilýär: “2025-nji ýylyň 13-nji iýunynda Aşgabadyň Halkara howa menzilinde BAE-niň awiakompaniýalarynyň gatnawynyň birnäçesiniň mejbury duruzylmagy bilen baglanyşykly Türkmenistanyň Hökümeti tarapyndan berlen asylly hyzmatdaşlygy we ynsanperwer goldawy üçin çuňňur minnetdarlyk bildirýär. Birnäçe sagadyň dowamynda garaşylan wagtynda agzalan uçuşlaryň ýolagçylaryny myhmansöýerlik bilen kabul etmek we ähli zerur bolan şertleri – iýmit we suw bilen üpjün edilmegi bizde uly täsir galdyrdy. Bu Türkmenistanyň Hökümetine we halkyna mahsus asylly ynsanperwerlik gymmatlyklarynyň aýdyň subutnamasy boldy...”
Şeýle hem bu asylly hereketiň, iki döwletiň arasyndaky doganlyk gatnaşyklarynyň çuňlugyny, agzybirligiň we özara goldawyň hakyky ruhuny görkezýändigi bellendi.
ORIENT
