Türkmenistan we BMG geljek bäş ýyldaky hyzmatdaşlygyň esasy ugurlaryny kesgitleýärler
22-nji maýda Türkmenistanyň Daşary işler ministri Raşid Meredow BMG-niň Türkmenistandaky agentlikleriniň hem-de bu guramanyň sebitleýin düzümleriniň ýolbaşçylarynyň gatnaşmagynda wideoaragatnaşyk görnüşinde Milletler Guramasynyň ýurt boýunça toparynyň mejlisi geçirildi. Duşuşygyň esasy temasy, BMG-niň 2026–2030-njy ýyllar üçin Durnukly ösüş ugrunda Hyzmatdaşlygyň çarçuwaly maksatnamasynyň täze tapgyry üçin Türkmenistanyň milli ileri tutulýan ugurlaryny kesgitlemek, şeýle hem Durnukly ösüş maksatlaryna (DÖM) ýetmek üçin işleri çaltlandyrmagyň ýollaryny gözlemek boldy.
Türkmenistanyň DIM-niň ýolbaşçysy Türkmenistanyň we BMG-niň parahatçylyk we howpsuzlyk, durmuş-ykdysady ugur, DÖM-iň durmuşa geçirilmegi, ulag we energetika, howanyň üýtgemegine garşy göreş hem-de beýleki birnäçe ulgamlar boýunça strategiki hyzmatdaşlygynyň esasy ugurlary barada giňişleýin durup geçdi.
Mejlisiň barşynda geçen ýyl döredilen “Türkmenistan – BMG” strategik maslahat beriş geňeşine esasy üns berildi. Bu Geňeş BMG bilen ýakyn hyzmatdaşlykda syýasy hem-de durmuş-ykdysady ugurlarda Türkmenistanyň milli maksatnamalaryny we halkara başlangyçlaryny durmuşa geçirmäge gönükdirilendir.
Gepleşikleriň dowamynda Türkmenistan bilen BMG-nyň ýöriteleşdirilen gurluşlarynyň arasynda durnukly ösüş, ulag, howanyň üýtgemegine garşy göreş we daşky gurşawy goramak ýaly ugurlarda mundan beýläkki hyzmatdaşlygyň geljegi barada uly pikir alyşyldy. Şeýle hem ynsanperwerlik ölçegi, şol sanda adam hukuklarynyň goralmagy, milli medeni mirasy gorap saklamak, bilim we saglygy goraýyş ulgamlaryna iň oňat tejribäni ornaşdyrmak we peýdalanmak ýaly meseleler ara alnyp maslahatlaşyldy.
BMG-niň bölümleriniň ýolbaşçylary öz çykyşlarynda Türkmenistanyň Hökümeti bilen alnyp barylýan bilelikdäki işler barada habar berdiler hem-de hyzmatdaşlygy has-da çuňlaşdyrmak boýunça pikirlerini we tekliplerini beýan etdiler.
Duşuşyga gatnaşyjylar işjeň we netijeli işleri dowam etdirmäge özara gyzyklanmany görkezýän ýakyn wagtda geçiriljek duşuşyklaryň meýilnamasy we meýilleşdirilen bilelikdäki çäreler barada ylalaşdylar.
ORIENT
