Zehinli talyp ýigitleriň arasynda geçirilýän döredijilik bäsleşiginiň ýeňijileri sylaglandy
6-njy maýda Magtymguly adyndaky milli sazly drama teatrynda Halkara parahatçylyk we ynanyşmak ýyly hem-de Ýeňiş güni mynasybetli ýurdumyzyň ýokary okuw mekdepleriniň zehinli talyp ýigitleriniň arasynda geçirilýän «Berkarar döwletiň täze eýýamynyň bagtyýar gerçekleri» atly döredijilik bäsleşiginiň jemleýji tapgyry boldy.
Türkmenistanyň Magtymguly adyndaky Ýaşlar guramasynyň Merkezi geňeşi we Bilim ministrligi tarapyndan bilelikde guralan bäsleşigiň birinji şerti boýunça talyp ýigitler özleriniň saýlap alan hünärleriniň jemgyýetdäki ornuny çeper okaýyş arkaly wasp etdiler. Soňra ikinji şerte laýyklykda, türkmen ýigidine mahsus edermenlik, mertlik, ruhubelentlik, adalatlylyk häsiýetlerini açyp görkezýän aýdymdyr sazlar, goşgudyr sahnalar ýerine ýetirildi.
Üçünji şertde bäsdeş ýigitler ýekelikde şorta sözleri ýerine ýetirip, dabaranyň şowhunyny artdyrdylar.
Şeýlelikde, emin agzalarynyň gelen netijesine laýyklykda, Magtymguly adyndaky Türkmen döwlet uniwersitetiniň himiýa fakultetiniň 5-nji ýyl talyby Rüstem Saryýew bäsleşigiň jemleýji tapgyrynyň Baş baýragyna eýe boldy we ýeňiji diýlip yglan edildi.
Baýrakly orunlara eýe bolan we bäsleşige işjeň gatnaşan talyplar Hormat hatlary hem-de ýadygärlik sowgatlary bilen sylaglandylar - diýip, Türkmenistanyň Bilim ministrliginiň metbugat gullugy habar berýär.
ORIENT
