Gruziýanyň Daşary işler ministrliginde Türkmenistanyň Mejlisiniň wekiliýeti bilen duşuşyk geçirildi
2025-nji ýylyň 23-nji aprelinde Gruziýa saparynyň çäklerinde Türkmenistanyň Mejlisiniň wekiliýetiniň agzalarynyň bu ýurduň Daşary işler ministrliginde ministriň orunbasary A.Hwtisiaşwiliniň bilen duşuşygy geçirildi.
Duşuşygyň barşynda taraplar Türkmenistan bilen Gruziýanyň arasyndaky hyzmatdaşlygyň häzirki ýagdaýyny hem-de mümkinçiliklerini ara alyp maslahatlaşdylar. Hususan-da, syýasy-diplomatik, söwda-ykdysady, medeni-ynsanperwer, şeýle hem halkara guramalaryň çäklerindäki özara gatnaşyklara aýratyn üns berildi. BMG-niň Baş Assambleýasy tarapyndan “2025-nji ýyl – Halkara parahatçylyk we ynanyşmak ýyly” hem-de “Türkmenistanyň hemişelik Bitaraplygy” atly Kararnamalarynyň kabul edilmeginde Gruziýanyň beren goldawyna Türkmenistan uly baha berýändigi bellenildi.
Ikitaraplaýyn gatnaşyklaryň toplumlaýyn we yzygiderli ösmeginiň berk binýady hökmünde çykyş edýän ýokary derejedäki saparlaryň orny aýratyn nygtaldy. Taraplar Gruziýanyň Premýer-ministri Irakli Kobahidzeniň Türkmenistana amala aşyran resmi saparynyň çäklerinde Türkmenistanyň Daşary işler ministri bilen Gruziýanyň Daşary işler ministriniň arasynda geçirilen duşuşygyň, şeýle hem her ýyl iki ýurduň Daşary işler ministrlikleriniň arasynda geçirilýän syýasy geňeşmeleriň ähmiýetini belläp geçdiler.
Duşuşygyň dowamynda ýurtlaryň arasynda özara düşünişmekligi we ynamy, döredijilikli hyzmatdaşlygy alyp barmakda wajyp gurallarynyň biri bolup durýan parlamentara gatnaşyklarynyň mümkinçiliklerine hem seredilip geçildi. Şu nukdaýnazardan esasy üns parlamentara dostluk toparlarynyň ähmiýeti bellenildi.
A.Sarjaýew söhbetdeşi A.Hwtisiaşwilini Türkmenistanyň hemişelik Bitaraplygynyň şanly 30 ýyllygyna hem-de 2025-nji ýyl – “Halkara parahatçylyk we ynanyşmak ýyly” diýlip yglan edilmegine bagyşlanyp, Türkmenistanda geçiriljek uly gerimli halkara çäreler bilen tanyşdyrdy.
Duşuşygyň ahyrynda taraplar köpugurly hyzmatdaşlygyň işjeňleşmegine gyzyklanma bildirdiler.
ORIENT
