Almaty şäherinde GDA-nyň DIM-niň geňeşiniň mejlisi we “Merkezi Aziýa – Russiýa” formatynda duşuşyk geçirildi
Türkmenistanyň Daşary işler ministriniň orunbasary Ahmet Gurbanowyň ýolbaşçylygyndaky Türkmenistanyň wekiliýeti Garaşsyz Döwletleriň Arkalaşygyna gatnaşyjy döwletleriniň Daşary işler ministrleriniň geňeşiniň mejlisine gatnaşdy.
11-nji aprelde Almaty şäherinde geçirilen çärä Azerbaýjanyň, Ermenistanyň, Belarusuň, Gazagystanyň, Gyrgyzystanyň, Russiýanyň, Täjigistanyň, Türkmenistanyň we Özbegistanyň daşary syýasat edaralarynyň, şeýle hem GDA-nyň Ýerine ýetiriji komitetiniň ýolbaşçylary gatnaşdylar.
Duşuşygyň barşynda Arkalaşygyň formatyndaky hyzmatdaşlygyň ugurlarynyň giň toplumy boýunça düýpli pikir alyşyldy. Ýakyn geljek üçin syýasy-diplomatik, söwda-ykdysady we medeni-ynsanperwer ugurlardaky köptaraplaýyn gatnaşyklar bilen bagly meseleler ara alnyp maslahatlaşyldy diýip, Türkmenistanyň DIM-niň metbugat beýanatynda aýdylýar.
Daşary işler ministrleriniň geňeşiniň indiki mejlisi 2025-nji ýylyň oktýabr aýynda, GDA-nyň döwlet Baştutanlarynyň sammitiniň öňüsyrasynda Duşanbe şäherinde geçiriler.
Şeýle hem, anna güni “Merkezi Aziýa – Russiýa” formatynda daşary syýasat edaralarynyň ýolbaşçylarynyň duşuşygy geçirildi.
Taraplar döwlet Baştutanlarynyň sammitinde gazanylan ylalaşyklary durmuşa geçirmek bilen baglylykda köptaraplaýyn gatnaşyklaryň geljegini ara alyp maslahatlaşdylar, şeýle hem söwda, ykdysady, maýa goýumlary, ulag-logistika hyzmatdaşlygynyň strategiki taýdan möhüm ugurlarynda özara peýdaly hyzmatdaşlygyň tertibini kesgitlediler.
ORIENT
