Türkmenistan we Mongoliýa birnäçe ugurlar boýunça hyzmatdaşlygy işjeňleşdirýärler
Türkmenistanyň medeniýet ministriniň orunbasary Nursähet Şirimow 7-nji aprel güni Ulan-Bator şäherine eden saparynyň dowamynda Mongoliýanyň Daşary işler ministrliginde kabul edildi. Duşuşykda Mongoliýanyň Daşary işler ministrliginiň döwlet sekretary Lhanaažawyn Munkhtuşig Mongoliýanyň hökümetiniň Türkmenistan bilen ýola goýlan dostlukly gatnaşyklaryň berkemegine, özara bähbitli söwda-ykdysady hyzmatdaşlygyň giňeldilmegine we ösdürilmegine uly ähmiýet berýändigini belledi.
Ol şeýle hem Mongoliýanyň Prezidenti Uhnaagiýn Hurelsuhyň 2024-nji ýylda Türkmenistana amala aşyran döwlet saparynyň iki ýurduň arasyndaky dostlukly gatnaşyklaryň we ykdysady hyzmatdaşlygyň çuňlaşdyrylmagyna hem-de berkidilmegine uly goşant goşandygyny nygtady.
Nursähet Şirimow iki ýurduň arasynda 1992-nji ýylda diplomatik gatnaşyklarynyň ýola goýulmagyndan bäri ikitaraplaýyn gatnaşyklaryň durnukly ösýändigine we sebitleýin hem-de halkara derejede hyzmatdaşlygyň berkidilýändigine kanagatlanma bildirdi.
Iki ýurduň arasyndaky dostlukly gatnaşyklaryň giňeldilmegi maksady bilen taraplar şu ýyl ýokary derejeli saparlary guramak, bilelikdäki hökümetara topar döretmek hem-de söwda, maýa goýumlar, oba hojalygy, ulag, logistika, medeniýet we bilim ýaly pudaklarda hyzmatdaşlygyň ösdürilmegi boýunça bilelikde işlemek barada ylalaşdylar diýip, Mongoliýanyň Milli habarlar agentligi habar berýär.
ORIENT
