Gruziýa sanly pasportlara geçýär
Gruziýada täze daşary ýurt pasportlarynyň tehniki aýratynlyklary üýtgediler. Olara QR-kod hem-de elektron maglumatlar üçin ýörite sahypa goşular. Bu barada SPRESS.ge neşiri Gruziýanyň adalat ministri Anri Ohanaşwiliniň 2025-nji ýylyň 3-nji aprelinde gol çeken degişli buýrugyna salgylanyp habar berýär. Pasport özgertmesiniň çäginde raýat, gulluk we diplomatik pasportlar üýtgediler. Şeýle hem bu özgertme ýurduň çäginde hasaba alnan bosgunlara we raýatlygy bolmadyk adamlara berilýän ýolluk pasportlaryna hem degişli bolar. Resminamalaryň dizaýnynda hem käbir üýtgeşmeler bolar. Hususan-da, pasportlaryň reňkli gabygynyň arka ýüzünde relýef görnüşinde ýurduň döwlet baýdagy hem-de ýurduň ady ýerleşdiriler. Mundan başga-da, pasportlaryň içki sahypalarynyň dizaýny täze görnüşde bolar. Pasportyň daşky reňkleri pasportyň görnüşine görä öňküsi ýaly tapawutly bolar: raýat pasporty — gara gyzyl, diplomatik pasport — gara gök, gulluk pasporty — gara, raýatlygy bolmadyk adamlar üçin — açyk gök, bosgunlar üçin — gök reňkli bolar. Täze nusgadaky pasportlar 2025-nji ýylyň 4-nji iýunyndan berilip başlanar. Şol bir wagtyň özünde, öň berlen köne pasportlar güýjüni ýitirmez.
Maglumat çeşmäniň bellemegine görä, 2025-nji ýylyň mart aýynda Adalat ministri başga bir buýruk bilen täze raýat şahsyýetnamalarynyň ornaşdyrylmagyny hem kanunlaşdyrdy. Täze gruzin ID kartlary global sanly ekosistemada giňden integrirlenen bolar, QR-kod bilen üpjün ediler hem-de tehniki mümkinçilikleri giňeltmäge mümkinçilik berer, şol sanda CBDC elektron pulluk gapjyk hyzmatlaryny goldar. Täze şahsyýetnamalaryň global sanly ID standartlaryna laýyk bolmagyna garaşylýar, şeýle hem olarda sanly görnüşdäki waksinasiýa şahadatnamalary we merkezleşdirilen sanly pul bilen amallar üçin blokçеýn platformasynda işleýän elektron gapjyk hem ýerleşer.
