Ynsanperwer ugurda türkmen-hytaý gatnaşyklarynyň ösüşi bellendi
28-nji martda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa “Parahatçylyk we ynanyşmak ýyly: çagalaryň hatyrasyna halkara işiniň ösüşi” atly halkara maslahata gatnaşmak üçin Türkmenistana sapar bilen gelen Hytaý Halk Respublikasynyň Sun Sinlin adyndaky gaznasynyň başlygynyň orunbasary hanym Şen Beili bilen duşuşdy.
Duşuşygyň dowamynda bellenilişi ýaly, türkmen halkynyň belent ynsanperwer ýörelgelerine eýerip, ýurdumyzda ene-atasyndan jyda düşen we howandarlyga mätäç çagalary goldamaga uly üns berilýär. Şu maksat bilen, Gahryman Arkadagymyzyň başlangyjy esasynda 2021-nji ýylyň martynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy döredildi. Şunda gaznanyň ugurdaş düzümler, abraýly halkara guramalar, şol sanda BMG-niň Çagalar gaznasy bilen işjeň hyzmatdaşlyk edýändigine üns çekildi.
Şu nukdaýnazardan Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy bilen Hytaý Halk Respublikasynyň Sun Sinlin adyndaky gaznasynyň arasynda netijeli gatnaşyklary ýola goýmak üçin ägirt uly mümkinçilikleriň bardygyny nygtadylar.
Sun Sinlin adyndaky gaznasynyň başlygynyň orunbasary haýyr-sahawat gaznasynyň asylly we ynsanperwer işlerini goldaýandygyny aýtdy hem-de gaznanyň döredilmeginiň 4 ýyllygy bilen gutlap, bu şanly sene mynasybetli guralýan halkara maslahata gatnaşmaga döredilen mümkinçilik üçin hoşallygyny bildirdi. Bu barada TDH habar berýär.
ORIENT
