Şymkent şäheri syýahatçylar üçin täze ulgamy girizýär
Gazagystanyň uly şäherleriniň biri bolan Şymkent daşary ýurtly syýahatçylar üçin CityPass atly täze ulgamy girizýär.
Bu innowasion taslama syýahatçylyk akymyny ýokarlandyrmaga hem-de şäheriň myhmanlaryna hödürleýän hyzmatlaryny gowulandyrmaga gönükdirilendir. Şeýlelik bilen, Şymkentiň syýahatçylyk infrastrukturasy täze ýokary hil derejesine çykarylar diýip, şäher häkimliginiň metbugat gullugy habar berýär.
CityPass kartlaryň eýeleri şäheriň medeni we taryhy ýädygärliklerine, muzeýlerine, seýilgählerine we häzirki zaman dynç-alyş merkezlerine ýeňillikli nyrhlar boýunça baryp bilerler.
CityPass kartlaryny onlaýn-platforma arkaly ýa-da ýörite satuw nokatlarynda alyp bolar. Maksatnamanyň çäklerinde kart eýeleri üçin arzanlaşyklar we ýörite teklipler göz öňünde tutulandygyny bellemek zerur.
Ulgamyň işlenip başlanmagy öňdäki syýahatçylyk möwsümine meýilleşdirildi. Şu wagtdan ol eýýäm hem syýahatçylyk operatorlarynda hem-de özbaşdak syýahatçylarda gyzyklanma döretdi. Taslama Gazagystanyň CROCOS IT-kompaniýasy tarapyndan durmuşa geçirilýär.
ORIENT
