ORIENT Hytaýyň “Xinhua” habar agentligi bilen maglumat hyzmatdaşlygynyň geljegini ara alyp maslahatlaşdy
Türkmenistanyň öňdebaryjy habarlar portaly bolan “ORIENT” web sahypasynyň ýolbaşçylary, Hytaýyň köpçülikleýin habar beriş serişdeleriniň wekilýetiniň Türkmenistana bolan saparynyň çäginde Hytaýyň Sinhua döwlet habarlar gullugynyň wekilleri bilen duşuşdy. Wekiliýete Sinhuanyň Merkezi Aziýa boýunça wekilhanasynyň direktory Çžao Ýun ýolbaşçylyk etdi.
Duşuşyga “ORIENT” tarapyndan “Media Türkmen” habarlar agentliginiň baş direktory we onuň düzümindäki “ORIENT” web sahypasynyň baş redaktory Bekdurdy Amansaryýew gatnaşdy.
Sinhua habar agentliginiň Türkmenistanyň öňdebaryjy media-guramalary bilen geçiren gepleşikleriniň çäginde bolup geçen duşuşyklarynyň dowamynda maglumat pudagynda mümkin bolan hyzmatdaşlygyň meseleleri ara alnyp maslahatlaşyldy. Taraplar habar mazmunyny alyşmak, sanly metbugat pudagyndaky hyzmatdaşlyk, şeýle hem Türkmenistanda, Hytaýda we Merkezi Aziýa sebitinde bolup geçen möhüm wakalary bilelikde beýan etmegiň mümkinçilikleri barada durup geçdiler.
Sinhua dünýädäki iň uly we iň täsirli habarlar agentliklerinden biridir. “ORIENT” opertiw we ygtybarly habarlar berip, Türkmenistanyň media-giňişliginde möhüm orny eýeleýär. Bu media-guramalarynyň ýolbaşçylyklarynyň arasyndaky duşuşyk, maglumat pudagynda halkara gatnaşyklaryny berkitmek baradaky özara gyzyklanmany nygtaýar we sebitdäki wakalary has giňişleýin we obýektiw beýan etmek üçin mümkinçilikler açýar.
ORIENT
