Türkmenistanda 321 sany iş kesilenleriň günäsi geçildi: täze durmuşa mümkinçilik
Türkmenistanyň Prezidenti Serdar Berdimuhamedow “Iş kesilenleriň mukaddes Gadyr gijesi mynasybetli günäsini geçmek hakynda” Permana gol çekdi. Günäsi geçilen raýatlar mundan beýläk azatlykdan mahrum etmek görnüşindäki esasy jeza çäresini çekmekden boşadyldy. Bu baradaky karar rehimdarlyk we ynsanperwerlik ýörelgelerini goldap, türkmen jemgyýetiniň hem-de her bir maşgalanyň agzybirligini, bitewüligini has-da pugtalandyrmak maksady bilen kabul edildi.
Bu barada penşenbe güni geçirilen Ministrler Kabinetiniň nobatdaky mejlisiniň barşynda belli boldy. Türkmenistanyň Prezidentiniň ýanyndaky Raýatlyk we günä geçmek meseleleri boýunça teklipleri taýýarlamak baradaky toparyň geçiren işleri baradaky hasabat bilen toparyň başlygy, Döwlet howpsuzlyk geňeşiniň sekretary B.Gündogdyýew çykyş etdi.
Döwlet Baştutanymyz hasabaty diňläp, asylly däbe eýerip, iş kesilenleriň mübärek Gadyr gijesi mynasybetli günäsini geçmek hakynda Permana gol çekdi. Prezident Serdar Berdimuhamedow toparyň başlygyna hukuk goraýjy edaralaryň ýolbaşçylary bilen bilelikde günäsi geçilen adamlary tussaglykdan boşadyp, olaryň ýakyn wagtda öz öýlerine, maşgala agzalarynyň arasyna barar ýaly, ähli zerur işleri geçirmegi tabşyrdy diýip, TDH-nyň habarynda bellenilýär.
Türkmenistanyň Prezidenti günäsi geçilen adamlara yhlasly zähmet çekip, eziz Watanymyza ak ýürekden hyzmat edip, halal zähmetiň hözirini görüp ýaşamaklaryny arzuw etdi. Mukaddes Gadyr gijesi mynasybetli geçirilýän bu ynsanperwer çäresi Türkmenistanyň ýokary ynsanperwerlik we rehimdarlyk ýörelgelerine eýerýändigini görkezdi.
ORIENT
