Türkmenistanyň Bilim ministrliginde öňdebaryjy bilim işgärlerini sylaglamak dabarasy geçirildi
20-nji martda Türkmenistanyň Bilim ministrliginde Milli bahar baýramy mynasybetli bilim işini pedagogiki ylmyň we terbiýäniň häzirki zaman maglumatlary hem-de nazaryýeti esasynda ýokary derejede guramakda, bilimiň mazmunyny has-da baýlaşdyrmakda, hilini ýokarlandyrmakda bitiren aýratyn ussatlyklary bilen tapawutlanyp işleýän bilim işgärlerini sylaglamak dabarasy geçirildi.
Bu çärä ýurdumyzyň umumybilim berýän orta mekdepleriniň we mekdebe çenli çagalar edaralarynyň ýolbaşçylary, göreldeli bilim işgärleriniň onlarçasy, KHBS-niň wekilleri gatnaşdylar. Dabarada çykyş eden bilim işgärleri ýurdumyzyň bilim ulgamynda ýetilýän sepgitler barada buýsançlaryny beýan etdiler.
Şeýle hem çäräniň dowamynda öňdebaryjy bilim işgärleriniň birnäçesine Türkmenistanyň Bilim ministrliginiň Hormat hatlary we ýadygärlik sowgatlary gowşuryldy.
Döwlet medeniýet institutynyň talyplar döredijilik toparynyň aýdym-sazly baýramçylyk çykyşlary hem dabara aýratyn öwüşgin berdi.
ORIENT
