Türkmenistanyň Prezidenti Demirgazyk Makedoniýa Koçani şäherinde bolup geçen pajygaly ýagdaý zerarly gynanç bildirdi
Türkmenistanyň Prezidenti Serdar Berdimuhamedow Demirgazyk Makedoniýa Respublikasynyň Prezidenti Gordana Silýanowskaýa-Dawkowa ýurduň Koçani şäherinde bolup geçen pajygaly ýangyn zerarly gynanç hatyny iberdi.
Döwlet Baştutany şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini beýan etdi. Şeýle hem Prezident Serdar Berdimuhamedow gynanç hatynda ejir çekenlere bolsa tiz wagtda sagalmaklary arzuw etdi.
Deslapky maglumata görä, konsert wagtynda ýüze çykan ýangyn pirotehnikanyň ulanylmagynyň netijesinde ýüze çykypdyr. Bu betbagtçylyk azyndan 59 adamyň, esasanam ýaşlaryň pida bolmagyna we 150-den gowrak adamyň ýaralanmagyna getirdi. Respublikada ýedi günlük matam yglan edildi.
ORIENT
