Kataryň Emiri wise-premýer Raşid Meredowyň ýolbaşçylygyndaky Türkmenistanyň wekiliýeti kabul etdi
16-njy martda Katar Döwletiniň Emiri Şeýh Tamim bin Hamad Al Tani Ministrler Kabinetiniň Başlygynyň Orunbasary, Daşary işler ministri Raşid Meredowyň ýolbaşçylygyndaky Türkmenistanyň wekiliýetini kabul etdi.
Duşuşygyň dowamynda Türkmenistanyň DIM-niň ýolbaşçysy Türkmenistanyň Hormatly Prezidenti Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Kataryň Emiriniň adyna ýollan mähirli salamyny we iň gowy arzuwlaryny ýetirdi.
Kataryň Emiri Şeýh Tamim bin Hamad Al Tani gowy arzuwlary üçin türkmen tarapyna minnetdarlyk bildirip, öz gezeginde Türkmenistanyň ýolbaşçylaryna iň gowy arzuwlaryny beýan edip, mukaddes Oraza aýynda tutulýan orazalaryň we ýagşy doga-dilegleriň Beýik Biribaryň dergähinde kabul bolmagyny arzuw etdi diýip, DIM-niň metbugat beýanatynda habar berilýär.
Taraplar Türkmenistan bilen Kataryň arasyndaky ikitaraplaýyn gatnaşyklarynyň işjeňleşýändigini bellediler. Türkmen wekiliýeti şu ýylyň 3-nji martynda türkmen halkynyň Milli Lideri, Türkmenistanyň Halk Maslahatynyň Başlygy bilen geçirilen telefon söhbetdeşliginiň ähmiýetini aýratyn nygtady.
Duşuşygyň dowamynda köptaraplaýyn formatlaryň çäginde iki ýurduň arasyndaky gatnaşyklaryň, ilkinji nobatda, Birleşen Milletler Guramasynyň çägindäki hyzmatdaşlygyň netijeliligi bellenildi. Raşid Meredow Katarayň Emirine Türkmenistanyň Bitaraplygynyň 30 ýyllygy mynasybetli 2025-nji ýylyň 12-nji dekabrynda Aşgabatda Parahatçylygyň we ynanyşmagyň halkara forumynyň geçiriljekdigi barada aýtdy we Katar tarapyna bu wekilçilikli halkara foruma we baýramçylyk çärelerine gatnaşmak üçin çakylygy gowşurdy.
ORIENT
