Ýewropa Bileleşiginiň Merkezi Aziýa boýunça Ýörite wekiliniň Türkmenistana ilkinji sapary
Ýakynda bellenilen Ýewropa Bileleşiginiň Merkezi Aziýa boýunça Ýörite wekili (ÝBÝW), ilçi Eduard Stipraýs, 4-6-njy mart aralygynda Türkmenistana iş saparyny amala aşyrdy. Jenap Stipraýs wezipesine bellenilenden üç gün soň Aşgabada geldi we bu, Ýewropa Bileleşiginiň Türkmenistan hem-de Merkezi Aziýa bilen özara gatnaşyklara ýokary baha berýändigini görkezdi.
Saparynyň dowamynda, jenap Stipraýs ÝB bilen Türkmenistanyň arasyndaky hyzmatdaşlygyň, sebitleýin durnuklylygyň we köptaraplaýyn özara gatnaşyklaryň esasy jähtlerini ara alyp maslahatlaşmak üçin ýokary derejede birnäçe duşuşyklary geçirdi. Ol, ykdysady gatnaşyklara, howpsuzlyk meselelerine we sebitleýin hyzmatdaşlyga aýratyn üns berip, ÝB bilen Türkmenistanyň arasyndaky gatnaşyklaryň häzirki ýagdaýyny we mümkinçiliklerini ara alyp maslahatlaşmak üçin Türkmenistanyň Ministrler Kabinetiniň başlygynyň orunbasary, Daşary işler ministri Raşid Meredow bilen duşuşdy. Türkmenistanyň Mejlisiniň başlygy D.Gulmanowa bilen duşuşygyň dowamynda, ikitaraplaýyn gyzyklanma bildirilýän pudaklarda Türkmenistanyň kanuny başlangyçlary we parlamentara hyzmatdaşlyk ara alyp maslahatlaşyldy.
Mundan başga, ÝBÝW BMG-niň Türkmenistandaky Hemişelik utgaşdyryjysy Dmitriý Şlapaçenko bilen duşuşyk geçirdi we onuň dowamynda, BMG bilen ÝB-niň ýurtdaky hyzmatdaşlygyny hem-de durnukly ösüş ugrunda bilelikdäki tagallalary ara alyp maslahatlaşdy. Aşgabat şäherindäki ÝHHG Merkeziniň ýolbaşçysy, ilçi Jon S. MakGregor bilen duşuşyk, Merkezi Aziýada ÝB bilen ÝHHG-nyň arasyndaky güýçlendirilen hyzmatdaşlyk üçin sebitleýin howpsuzlyk synaglaryna we mümkinçiliklerine bagyşlanyldy. Merkezi Aziýa üçin öňüni alyş diplomatiýa boýunça BMG-niň Sebitleýin merkeziniň (UNRCCA) ýolbaşçysy Kaha Imnadze bilen gepleşikleriň dowamynda, taraplar dawalary ýatyrmak boýunça köptaraplaýyn çemeleşmeleri we durnuklylygy üpjün etmekde sebitleýin guramalaryň ornuny ara alyp maslahatlaşdylar.
Şeýle hem, jenap Stipraýs, sebitleýin maksatlar boýunça diplomatiki gepleşigi pugtalandyryp, ÝB-niň missiýalarynyň ýolbaşçylary we Merkezi Aziýa döwletleriniň ilçileri duşuşdy. Bu sapar, sebitleýin hyzmatdaşlyga, ykdysady ösüşe we howpsuzlyk meseleleri boýunça gepleşige aýratyn üns berip, ÝB-niň Türkmenistan hem-de tutuş Merkezi Aziýa sebiti bilen özara gatnaşyklary pugtalandyrmaga ygrarlylygyny tassyklady.
ORIENT
