«Türkmenistanyň Ulag-logistika merkezi» açyk görnüşli paýdarlar jemgyýeti Belarus kaliý ýükiniň üstaşyr gatnawyny amala aşyrýar
«Türkmenistanyň Ulag-logistika merkezi» açyk görnüşli paýdarlar jemgyýeti, ýurdumyzyň demirýol ulaglarynda konteýner gatnawlarynyň operatory bolup çykyş etmek bilen, «Demirgazyk-günorta» halkara ulag-üstaşyr geçelgesiniň çäginde uly möçberlerde konteýner gatnawlaryny amala aşyrmaklyga dowam edýär.
«Türkmenistanyň Ulag-logistika merkezi» (TULM) açyk görnüşli paýdarlar jemgyýeti 2025-nji ýylyň fewral aýyndan başlap, Belarus Respublikasynyň iri mineral dökünlerini öndüriji kärhanasy AGPJ «Беларуськалий» kärhanasynyň kaliý ýüküni başlangyç jemi her biri 62 sany 40-futluk konteýnerden ybarat bolan 2 sany synag görnüşindäki konteýner otly düzümini Belarusiýa – Russiýa – Gazagystan – Türkmenistan – Eýran ugry boýunça ýurdumyzyň Etrek stansiýasynyň üsti bilen olary Eýran (Bender Abbas portundan) deňiz gatnawlary arkaly Hytaýyň gündogar deňiz portlaryna ugradyp başlady. Bu barada TULM öz saýtynda habar berýär.
Synag konteýner otly düzümleriniň jemi 8 gatnawdan ybarat bolup, her aýda 20 000 tonna çenli gatnawy amala aşyrmak meýilleşdirilýär.
Gelejekde hem «Türkmenistanyň Ulag-logistika merkezi» açyk görnüşli paýdarlar jemgyýeti, «Demirgazyk-günorta» halkara ulag-üstaşyr geçelgesi arkaly bu kaliý ýükli konteýner otly düzümlerini Hindistanyň portlaryna hem ugratmaklyk göz öňünde tutulýar.
ORIENT
