Özbegistan we Türkmenistan durmuş taýdan goramak ulgamy boýunça hyzmatdaşlyk mümkinçilikleri barada maslahatlaşdylar
27-nji fewralda Özbegistan Respublikasynyň Prezidentiniň ýanyndaky Milli durmuş taýdan goramak agentliginiň direktory Mansurbek Olloýorowyň Türkmenistanyň zähmet we ilaty durmuş taýdan goramak ministri Muhammetseýit Silapow bilen wideo aragatnaşyk arkaly maslahaty geçirildi. Duşuşygyň dowamynda taraplar durmuş taýdan goramagyň möhüm meseleleri boýunça pikir alyşdylar hem-de ikitaraplaýyn hyzmatdaşlygy berkitmek mümkinçiliklerini ara alyp maslahatlaşdylar.
Özbek tarapy ilatyň durmuş taýdan gowşak toparyna goldaw bermek boýunça amala aşyrylýan başlangyçlar, gazanylan netijeler we öňde duran wezipeler baradaky maglumatlar bilen tanyşdyrdy. Durmuş taýdan goramak ulgamyny sanlylaşdyrmak, durmuş taýdan kömek bermegiň netijeliligini ýokarlandyrmak hem-de durmuş hyzmatlar ulagymyny ösdürmek meselelerine aýratyn ähmiýet berildi.
Gepleşikleriň netijeleri boýunça möhüm ugurlar boýunça, şol sanda ilata goldaw bermek gurallaryny kämilleşdirmek, maýyplygy bolan adamlaryň saglygyny dikeltmek babatda tejribe alyşmak hem-de durmuş taýdan goramak ulgamyna döwrebap tehnologiýalary ornaşdyrmak babatda bilelikdäki iş baradaky ylalaşyga ýetildi.
Agentligiň direktory Türkmenistanyň zähmet we ilaty durmuş taýdan goramak ministrini durmuşa geçirilýän taslamalar bilen tanyşmak we bu ugurdaky dialogy dowam etdirmek maksady bilen Özbegistana çagyrdy. Duşuşyk oňaýly we işewür ýagdaýda geçirildi.
ORIENT news
