Türkmenistanyň Maliýe we ykdysadyýet ministrliginde Bütindünýä bankynyň wise-prezidenti bilen duşuşyk geçirildi
27-nji fewralda Türkmenistanyň Maliýe we ykdysadyýet ministrliginde Maliýe we ykdysadyýet ministri Mämmetguly Astanagulow bilen Bütindünýä bankynyň wise-prezidenti Antonella Bassaniniň duşuşygy geçirildi. Duşuşyga Bütindünýä bankynyň sebit direktorlary we Halkara maliýe korporasiýasynyň wekilleri hem gatnaşdy.
Duşuşygyň mowzugy Türkmenistan bilen Bütindünýä bankynyň arasyndaky hyzmatdaşlygy giňeltmegiň ýollary boldy. Ara alyp maslahatlaşmalaryň dowamynda taraplar bilelikdäki taslamalary ýurdumyz üçin ileri tutulýan ugurlarda durmuşa geçirmek üçin mundan beýläkki ädimleri beýan etdiler.
Bütindünýä banky, ykdysadyýeti diwersifikasiýalaşdyrmak we strategiki maksatlara ýetmek üçin ykdysady özgertmeleri amala aşyrmak ugrundaky tagallalarynda Türkmenistany goldamaga taýýardygyny mälim etdi.
Türkmenistanyň Maliýe we ykdysadyýet ministri Bütindünýä banky bilen üstünlikli hyzmatdaşlygyň ýurduň uzak möhletleýin maksatnamalarynyň durmuşa geçirilmeginde möhüm görkeziji bolup durýandygyny belläp, durnukly we inklýuziw ösüşi üpjün etmek üçin hyzmatdaşlygy mundan beýläk-de has-da berkitmäge bolan islegini tassyklady diýip, Maliýe we ykdysadyýet ministriliginde habar berildi.
ORIENT
