“Euronews” Türkmenistanda habarçylaryny akkreditirlemegi we geljekde habarçylar nokadyny açmagy meýilleşdirýär
Duşuşykda taraplar dünýäde köp dilli maglumat beriji teleýaýlymlaryň arasynda öňdebaryjylaryň biri bolan “Euronews” bilen Türkmenistanyň arasyndaky hyzmatdaşlygyň oňyn tejribesini bellemek bilen, gatnaşyklary ulgamlaýyn esasda ösdürmäge bolan gyzyklanmalary beýan etdiler.
Hyzmatdaşlygyň täze görnüşleri, şol sanda Türkmenistanyň medeniýet, sport, syýahatçylyk ýaly ugurlardaky ösüşleri, durnukly ösüş, ekologiýa, ulag we ýaşyl energetika ulgamlaryndaky mümkinçilikleri barada giň köpçüligiň habarlylygyny ýokarlandyrmak ýaly ugurlara garaldy diýip, DIM-niň metbugat gullugy habar berdi.
BMG-iň Baş Assambleýasynyň kararnamasyna laýyklykda, Türkmenistanyň başlangyjy bilen “Halkara parahatçylyk we ynanyşmak ýyly” diýlip yglan edilen üstümizdäki ýylda Türkmenistanda geçirilmegi meýilleşdirilýän halkara ähmiýetli çärelere aýratyn üns çekildi. Şunuň bilen baglylykda, şu ýylda şanly 30 ýyllygy giňden bellenilýän Türkmenistanyň oňyn bitaraplyk syýasatynyň ähmiýeti aýratyn bellenildi.
Taraplar türkmen žurnalistleriniň hünär derejesini ýokarlandyrmak hem-de “Euronews” bilen ýerli teleýaýlymlaryň arasynda hyzmatdaşlyk etmek boýunça degişli resminamalary işläp düzmek arkaly özara gatnaşyklaryň täze görnüşlerini ýola goýmagyň mümkinçiliklerini ara alyp maslahatlaşdylar.
Söhbetdeşler “Euronews”-iň habarçylaryny Türkmenistanda akkreditasiýa etmek we soňlugy bilen Aşgabatda habarçylar nokadyny açmak mümkinçiliklerine garadylar.
ORIENT
