Aşgabat we Bişkek daşary syýasat edaralarynyň ýolbaşçylary derejesinde syýasy geňeşmeleri geçirdi
Türkmenistan we Gyrgyzystan daşary syýasat edaralarynyň arasynda syýasy geňeşmeler geçirdi. Türkmen tarapyna Daşary işler ministri Raşid Meredow, gyrgyz tarapyna – onuň kärdeşi Žeenbek Kulubaýew ýolbaşçylyk etdi.
Gün tertibine türkmen-gyrgyz hyzmatdaşlygynyň möhüm meseleleri, döwletara ylalaşyklarynyň ýerine ýetirilişine seljerme, geljekki işleriň ileri tutulýan ugurlary girizildi. Dürli derejelerde geçiriljek duşuşyklaryň tertibi jikme-jik gözden geçirildi.
Türkmenistanyň DIM-niň maglumatyna görä, diplomatlar Halkara parahatçylyk we ynanyşmak ýylynyň maksatnamasynyň çäginde bilelikdäki hereketleri ara alyp maslahatlaşdylar we halkara guramalarynyň meýdançalarynda, hususan-da BMG, ÝHHG, YHG, şeýle hem “Merkezi Aziýa +” formatlarynyň ugry boýunça umumy garaýyşlary öňe sürmäge taýýardyklaryny tassykladylar, hem-de sebit hem-de halkara gün tertibiniň meseleleri boýunça pikir alyşdylar. Parlamentara gatnaşyklaryna aýratyn üns berildi.
Şeýle hem söwda-ykdysady hyzmatdaşlygynda bar bolan mümkinçilikden doly peýdalanmak, özara bähbitli gatnaşyklary diwersifikasiýalaşdyrmak, özara haryt dolanyşygynyň möçberlerini artdyrmagyň ýollary boýunça pikir alyşmalar boldy. Taraplar ynsanperwer ugurdaky gatnaşyklary, şol sanda garşylykly Medeniýet günlerini we beýleki döredijilik çärelerini guramagy, ylym we bilim pudagyndaky gepleşikleri we sport arkaly gatnaşyklary işjeňleşdirmegiň tarapdarydyklaryny beýan etdiler.
Duşuşygyň netijeleri boýunça Raşid Meredow we Žeenbek Kulubaýew Türkmenistan bilen Gyrgyzystanyň Daşary işler ministrliginiň arasynda 2025–2026-njy ýyllarda hyzmatdaşlyk etmegiň maksatnamasyna gol çekdi.
ORIENT
