Syýahatçylyk, ykdysadyýet we medeniýet: Euronews bilen Türkmenistan özara hyzmatdaşlygyň mümkinçiliklerini gözleýär
18-nji fewralda, Ýewropanyň iň uly köpçilikleýin habar beriş serişdesi bolan Euronews teleýaýlymynyň Brýusseldäki ofisinde, Türkmenistanyň Belgiýadaky ilçisi Sapar Pälwanow bilen Euronews-iň dolandyryjylar geňeşiniň başlygy Pedro Wargas Dawid duşuşdy.
Türkmen diplomaty Türkmenistanyň media diplomatiýasy barada gürrüň berip, ýurduň halkara media giňişligindäki ornuny we habar beriş serişdeleri bilen hyzmatdaşlyga ygrarlydygyny nygtady. Şeýle hem, Türkmenistanyň bitaraplygynyň 30 ýyllygynyň we Halkara parahatçylyk we ynanyşmak ýylynyň ähmiýetini belledi. Ilçi, Türkmenistanyň sebitleýin durnuklylyga goşýan goşandyny, ilçihana tarapyndan yzygiderli guralýan metbugat brifinglerini hem-de Türkmenistanyň we Ýewropa Bileleşiginiň arasyndaky gatnaşyklaryň ösüşini aýratyn belledi.
Öz gezeginde, Euronews-yň başlygy, kompaniýany Ýewropanyň öňdebaryjy mediaplatformasy hökmünde häsiýetlendirip, onuň 19 dilde 1,2 milliard adamlyk tomaşaçylar köpçüligini öz içine alýandygyny aýtdy. Şeýle hem, 24 sagatlap işleýän ýewropaly habar teleýaýlymynyň web sahypasyna we ykjam goşundysyna her aýda ortaça 29 million özboluşly ulanyjynyň girýändigini belläp geçdi.
Pedro Wargas Dawid Türkmenistana sapar etmek we ýerli metbugat serişdeleri, şeýle hem media bilen baglanyşykly döwlet edaralary bilen gatnaşyklary ýola goýmak niýetini beýan etdi. Şeýle hem, ýurduň medeniýeti bilen tanyşmak isleýändigini belledi. Ol Euronews-yň bitaraplyk ýörelgelerine ygrarlydygyny we Merkezi Aziýa bilen baglanyşykly habarlaryň obýektiw we bitarap esasda taýýarlanylýandygyny nygtady. Şeýle hem, sebitiň söwda merkezi we ulag geçelgesi hökmünde ähmiýetiniň uludygyny belledi.
Duşuşygyň dowamynda Euronews bilen Türkmenistanyň arasynda mümkin bolan hyzmatdaşlygyň ugurlary ara alnyp maslahatlaşyldy. Hususan-da, syýahatçylygy, ykdysady ösüşi, medeni alyş-çalşy we möhüm wakalaryň şöhlelendirilmegini giňeltmek boýunça mümkinçilikler ara alnyp maslahatlaşyldy. Euronews, Türkmenistany öz platformasynda has giňişleýin görkezmek islegini beýan edip, hyzmatdaşlygyň dürli görnüşlerini, şol sanda brendleşdirilen wideolar we mahabat bilen işleşmek teklibini hödürledi.
Mundan başga-da, Euronews, Türkmenistany öz işjeň gepleşik maksatnamalaryna goşmaga taýýardygyny mälim etdi. Bu programmalar hatarynda syýahatçylyk gepleşikleri ("Explore"), medeniýet we sungat baradaky gepleşikler ("Cult"), ýerli ilat bilen söhbetdeşlikler ("Meet the Locals") bar.
Duşuşygyň ahyrynda, taraplar özara hyzmatdaşlygy ösdürmek we Türkmenistany Euronews platformasynda has giňden şöhlelendirmek üçin täze mümkinçilikleri öwrenmek barada öz isleglerini tassykladylar.
Euronews, ýokary derejeli tomaşaçylar bilen işlemäge ýöriteleşdirilen teleýaýlymdyr. Onuň tomaşaçylarynyň hatarynda dünýä liderleri, syýasatçylar we Ýewropanyň hem-de dünýäniň geljegini kesgitleýän ýolbaşçylar bar.
Pedro Wargas Dawidiň sözlerine görä, merkezi habar redaksiýasynyň Belgiýanyň paýtagtyna göçürilmeginden soň, Euronews “Brýusselde bolup geçýän wakalaryň merkezinde Ýewropa meselelerini giňden beýan edýän iň uly teleýaýlyma” öwrüldi.
Şeýle hem, Euronews-yň Astana, Baku we Daşkent şäherlerinde ofisleriniň açylmagyny bellemek möhümdir. Bu ofisler Dohada hereket edýän redaksiýa bilen bilelikde işläp, teleýaýlymyň Ýakyn Gündogar, Kawkaz we Merkezi Aziýa sebitlerindäki gatnaşygyny has-da giňelder.
ORIENT
