Türkmenistanyň taslamalary “EkoDünýä-2024" halkara bäsleşiginiň sylaglary bilen tapawutlandy
7-nji fewralda Moskwada Merkezi alymlar öýünde Russiýanyň Tebigaty ylymlary akademiýasy tarapyndan geçirilen “EkoDünýä-2024” atly halkara ekologiýa bäsleşiginiň netijelerini yglan etmek dabarasy geçirildi.
Türkmenistandan üç taslama bu bäsleşigiň eminleri tarapyndan ykrar edildi. Hususan-da, “Duzly suwdan elektrik energiýasyny öndürmegiň innowasion usuly” we “Fandomat” atly plastik galyndylary aýratyn ýygnamak üçin innowasiýa” atly taslamalara halkara ekologiýa baýragy bilen sylaglandy. Çöl meýdanlarynda çägäniň ýeliň täsirinde süýşmegini matematiki hasaplamagyň we ony berkitmegiň usullary baradaky taslama III derejeli laureat diplomyna we bäsleşigiň medalyna mynasyp boldy.
Guramaçylar baýraklary Russiýa Federasiýasyndaky Türkmenistanyň Ilçihanasynyň wekiline gowşuryp, türkmenistanly gatnaşyjylaryň işlerinde gozgalýan ylmy meseleleriň ýerliklidigini, awtorlaryň ýokary bilim başarnyklaryna we döredijilikli çemeleşmä eýediklerini aýratyn bellediler.
“EkoDünýä-2024” atly halkara ekologiýa bäsleşigi 2003-nji ýyldan başlap ýylda geçirilýär we Russiýanyň Tebigaty ylymlary akademiýasy çäräniň gurnaýjysy bolup çykyş edýär.
2024-nji ýylda 23 ýurtdan wekiller “EkoDünýä” atly bäsleşigine gatnaşyp, ekologiýa ylmyny ösdürmäge, ilatyň ekolgiýa bilimini we medeniýetini ýokarlandyrmaga, ekologiýa taýdan arassa tehnologiýalary ýaýratmaga, ilatyň saglygyny berkitmäge we biodürlüligi gorap saklamaga gönükdirilen 150-den gowrak işler emin agzalarynyň garamagyna hödürlendi.
ORIENT
