Lomonosow adyndaky Moskwa döwlet uniwersitetiniň döredilenine 270 ýyl boldy
1755-nji ýylyň 25-nji ýanwarynda şa zenany Ýelizaweta Petrowna Russiýanyň ilkinji uniwersitetini döretmek hakynda permana gol çekdi. Şu gün resmi taýdan MDU-nyň esaslandyrylan güni hasap edilýär. Uniwersitetiň Moskwada döredilmegi köplenç iki adamyň – alym-ensiklopedist Mihail Wasilýewiç Lomonosowyň we onuň ýarany, Uniwersitetiň ilkinji kuratory, graf Iwan Iwanowiç Şuwalowyň tagallalarynyň netijesi boldy.
Başda okuw filosofiýa, lukmançylyk we hukuk fakultetlerinde alnyp barylýardy. Häzirki wagtda MDU-da birnäçe şahamça, takmynan 40 fakultet we 50 müňden gowrak talyp we aspirant bar. Bu ýerde 6 müňden gowrak professor we mugallym, 6 müň ylymlaryň kandidaty, 3 müň ylymlaryň doktory we 300-den gowrak Russiýanyň Ylymlar akademiýasynyň akademigi işleýär! MDU uly ylmy-barlag merkezine öwrüldi. Uniwersitet ylym, bilim we medeniýeti ösdürmekde ägirt uly rol oýnapdyr.
1940-njy ýyldan bäri Moskwa döwlet uniwersiteti Mihail Wasilýewiç Lomonosowyň adyny göterýär. Mihail Wasilýewiç Lomonosow diňe bir ylymlary we bilimleri ýaýratmak arkaly Russiýanyň gülläp ösüp biljekdigine ynanýardy. Onuň ömrüniň esasy işi Russiýanyň ylmyny Ýewropa derejesine çykarmak bolup, bu işde ol ajaýyp üstünlik gazandy. Häzirki wagtda M.W. Lomonosow adyndaky MDU Russiýanyň iň gowy uniwersiteti we dünýäniň öňdebaryjy uniwersitetleriniň biridir.
ORIENT news
