“Galkynyş” dünýäniň sirk sahnasynda
Türkmenistanyň “Galkynyş” milli at üstündäki oýunlar topary Monte-Karloda geçirilen 47-nji halkara sirk festiwalyna gatnaşdy. “Galkynyş” milli at üstündäki oýunlar topary Türkmenistanyň sungatyny we medeniýetini dünýä sahnasynda ýene bir gezek hödürledi. Toparyň çapyksuwarlary halkara ýaryşlarynyň birnäçe gezek çempionlarydyr.
Monte-Karloda 1974-nji ýylda şazada Rainier III tarapyndan döredilen Halkara sirk sungaty festiwaly her ýylyň ýanwar aýynda meşhur Fonweý sirk çadyrdan gümmezde geçirilýär. Monte-Karlonyň halkara sirk festiwaly sirk sungaty dünýäsinde iň möhüm wakalaryň biridir.
2006-njy ýyldan bäri festiwalyň prezidenti wezipesini Monakonyň şazadasy Stefani ýerine ýetirýär. Bu festiwal dürli sirk sungat işgärlerini bir ýere jemleýän dünýäniň sirk äleminde iň abraýly çäreleriň biridir. Festiwalyň maksatnamasynyň wideo ýaýlymlary bütin dünýäde alnyp barylýar. On günüň dowamynda Fonweý çadyrdan gümmezde ajaýyp tomaşa bolýar. Akrobatlar, baş öwredijiler, howa gimnastikaçylary we masgarabazlar her ýyl tomaşaçylar üçin joşgunly çykyşlary taýýarlaýarlar.
ORIENT news
