Daşary ýurtlylar üçin wizasyz syýasaty we beýleki çäreler Hytaýyň syýahatçylyk pudagyny ösdürýär
Hytaýda ýurduň hökümeti tarapyndan girizilen daşary ýurtlylar üçin wizasyz syýasaty syýahatçylyk pudagyny ep-esli derejede janlandyrdy. Bu barada CGTN habar berýär.
Bu karar Hytaýa syýahatçylyk ugry hökmünde, hususan-da gyş paslynda barha ösýän gyzyklanmasynyň netijesinde kabul edildi. Bu döwür daşary ýurtlylar ýurduň ajaýyp medeni we tebigy ýadygärliklerine baryp görmek isleýärler. Bilermenleriň berýän maglumatlaryna görä, Hytaýda halkara syýahatçylygy pandemiýadan öňki görkezijilerden 90 % derejesine ýetdi. 240 sagada ýetirilip bilinýän wizasyz döwür daşary ýurtly syýahatçylara paýtagtda we beýleki şäherlerde erkin gezelenç etmäge mümkinçilik berýär. Mysal üçin, Pekin 798 art-zolagy ýaly medeni ýerleriň netijesinde meşhur ugra öwrüldi. Täze ýyl baýramçylyklarynyň döwründe ol ýerde bir gijede 100 müňe golýa adam ýygnanyşdy. Mundan başga-da, wideo oýunlar we gysgaça wideo ýazgylar arkaly tanyşdyrylýan hytaý medeniýeti bütin dünýäniň ýaşlaryny özüne çekip, medeni alyş-çalyş üçin täze mümkinçilikleri döredýär.
Infrastrukturanyň ösdürilmegi we Harbindäki buz şäheri ýaly syýahatçylyk brendleriň döredilmegi esasy ugur bolup durýar. Ýerli häkimiýetler we Hunan ýaly welaýatlar goşmaça artykmaçlyklary, şol sanda daşary ýurtlylar üçin mugt ýaşaýşy we iýmitlendirmäni hödürleýärler. Bu çäreleriň ählisi 2025-nji ýylyň Hytaýyň syýahatçylyk pudagy üçin möhüm ýyla öwrülmegine gönükdirilendir.
ORIENT news
