Petronas we CNPC durnukly energetika babatda çözgütleri ösdürmek üçin Ähtnama gol çekdiler
Bütin dünýäde durnukly energetika babatda çözgütleri ösdürmek maksady bilen Malaýziýanyň Petrolium Nasional Berhad (PETRONAS) nebitgaz kompaniýasy hem-de Hytaýyň milli nebit korporasiýasy bolan CNPC özara düşünişmek hakynda Ähtnama gol çekdiler.
Resminama Hytaýyň 7-nji halkara import sergisiniň (CIIE) çäklerinde geçirilen CNPC Halkara hyzmatdaşlyk forumynda gol çekildi. PETRONAS kompaniýasynyň prezidenti we baş direktory Tan Şri Tengku Muhammad Taufik hem-de CNPC kompaniýasynyň başlygy Daý Houlýan bu resminama öz gollaryny çekdiler.
Bu hyzmatdaşlyk Malaýziýa bilen Hytaýyň arasyndaky diplomatik gatnaşyklaryň ýola goýulmagynyň 50 ýyllygyna bagyşlanyp, iki ýurduň arasyndaky berk dostlugy alamatlandyrýar. Ähtnamanyň esasy maksatlary nebitiň we gazyň barlaglary we olaryň gazyp alnyşy, şeýle hem suwuklandyrylan tebigy gazyň (STG) üpjünçilik zynjyrlary boýunýa hyzmatdaşlygy berkitmekden ybaratdyr. Mundan başga-da, taraplar ýörite himiki serişdeleri, gaýtadan dikeldilýän energiýa, ýaşyl wodorod tehnologiýalary we uglerody tutma ýaly öňdebaryjy pudaklar boýunça innowasion taslamalara ünsüni jemlemegi göz öňünde tutýarlar.
Bilim we iň gowy tejribeleri alyşmak üçin açyk meýdançanyň döredilmegi hem bu hyzmatdaşlygyň esasy bölegi bolar. Bu bolsa sebitiň durnukly energetika geçişini çaltlandyrmaga ýardam eder.
ORIENT news
