Şweýsariýanyň täze Prezidenti Karin Keller-Zutter wezipesine girişdi
1-nji ýanwarda Şweýsariýanyň Maliýe ministri Karin Keller-Zutter ýurduň Prezidenti wezipesine girişdi, onuň ygtyýarlyk möhleti 2025-nji ýylyň ahyrynda tamamlanýar diýip, TASS habar berýär.
Geçen ýylyň dekabrynda ýurduň parlamentinde Keller-Zutteriň 2025-nji ýylda döwlet Baştutany wezipesine saýlanandygy habar berildi. Ol 1-nji ýanwardan Konfederasiýanyň Goranmak ministri Wiola Amherdiň ornuna geçip, bu wezipäni eýeledi.
Şweýsariýada Karin Keller-Zutter iň täsirli syýasatçylaryň biri hasaplanýar. Maliýe ministri hökmünde durnukly ýagdaýy saklamak bilen bagly birnäçe täsirli çäreleri bilen tapawutlandy.
Keller-Zutter 1963-nji ýylda katolik maşgalasynda dünýä indi. Sýurihiň Amaly ylymlar uniwersitetinde terjimeçilik hünäri boýunça bilim alýar, soňra bolsa Friburg uniwersitetinde pedagogika ugry boýunça aspiranturany tamamlaýar. 1992-nji ýylda syýasy karýerasyna başlaýança mekdepde mugallym bolup işleýär.
ORIENT news
