Türkmenistanyň Prezidenti amerikan işewür toparlarynyň wekilleri bilen duşuşdy
16-njy dekabrda Türkmenistanyň Prezidenti Serdar Berdimuhamedow Türkmen-amerikan işewürlik forumyna gatnaşmak üçin ýurdumyza gelen “Türkmenistan — ABŞ” işewürler geňeşiniň Ýerine ýetiriji direktory Erik Stýuarty, “John Deere” kompaniýasynyň Merkezi Aziýada strategik hyzmatdaşlygy ösdürmek boýunça ýolbaşçysy Çaba Leýkony we “Westport Trading Europe Limited” kompaniýasynyň müdiriýetiniň başlygy Nikolaý Ýurçenkony kabul etdi.
Telekeçiler ABŞ-nyň işewür toparlarynyň berk ykdysady mümkinçiligi bolan Türkmenistan bilen has netijeli gatnaşyklary ösdürmek islegini tassykladylar.
Döwlet Baştutany Türkmen-amerikan işewürlik forumynyň Türkmenistan bilen Amerikanyň Birleşen Ştatlarynyň arasyndaky maýa goýum hyzmatdaşlygyny pugtalandyrmaga ýardam berjekdigine ynam bildirdi. ABŞ-ly hyzmatdaşlaryň şu gezekki saparynyň çäklerinde türkmen kärdeşleri bilen geljegi uly ugurlar boýunça pikir alyşmaga mümkinçilik dörejekdigini belläp, Serdar Berdimuhamedow şol gepleşikleriň iki ýurduň arasyndaky özara bähbitli hyzmatdaşlygyň mundan beýläk-de ösdürilmegine täze itergi berjekdigini nygtady.
Döwlet Baştutany birnäçe ýyllaryň dowamynda üstünlikli hereket edýän “Türkmenistan — ABŞ” işewürler geňeşiniň özara bähbitli gatnaşyklary ösdürmäge goşýan saldamly goşandyny aýratyn belledi. Işewürler geňeşi iki ýurduň ykdysady düzümleriniň arasyndaky gatnaşyklary ýola goýmak, ösdürmek we berkitmek üçin netijeli gurala öwrüldi.
Söhbetdeşligiň dowamynda nebitgaz pudagy, elektroenergetika, gaýtadan dikeldilýän energetika, ulag-aragatnaşyk, oba hojalygy, ýokary tehnologiýalar ýaly ulgamlar bilelikdäki işiň geljegi uly ugurlarynyň hatarynda görkezildi diýip, Türkmenistanyň Döwlet teleradio ýaýlymynyň habarlar gepleşiginde habar berildi.
Döwlet Baştutany Türkmenistanyň amerikan kompaniýalary bilen hyzmatdaşlygyň giňeldilmegine gyzyklanma bildirýändigini we olaryň anyk tekliplerine seretmäge taýýardygyny tassyklady.
ORIENT
