Türkmenistanyň Prezidenti we Ermenistanyň ilçisi hyzmatdaşlygyň uly mümkinçiligini bellediler
Prezident Serdar Berdimuhamedow Ermenistan Respublikasynyň Türkmenistanda täze bellenen ilçisi Arsen Awagýandan ynanç hatyny kabul etdi.
Ilçi döwlet Baştutanyna hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa Ermenistan Respublikasynyň Prezidentiniň we Premýer-ministriniň mähirli salamyny ýetirdi. Dostlukly ýurduň ýolbaşçylary ähli türkmen halkyna iň gowy arzuwlaryny iberdiler.
Serdar Berdimuhamedow öz gezeginde dostlukly ýurduň ýokary derejeli ýolbaşçylaryna iň gowy arzuwlaryny beýan etdi hem-de diplomaty jogapkärli wezipä bellenilmegi bilen ýürekden gutlap, türkmen-ermeni dialogyny mundan beýläk-de berkitmek işinde üstünlikleri arzuw etdi.
13-nji dekabrda Türkmenistanyň Döwlet teleradio ýaýlymynyň habarlarynda bellenilişi ýaly, duşuşygyň dowamynda taraplar giň ugurlarda netijeli gatnaşyklary ösdürmek we diwersifikasiýalaşdyrmak üçin ägirt uly mümkinçilikleriň bardygyny nygtadylar. Türkmenistan hem-de Ermenistan syýasy, söwda-ykdysady, medeni-ynsanperwer ulgamlarda hyzmatdaşlygyň oňyn tejribesine eýe bolup, halkara gün tertibiniň möhüm meseleleri boýunça özara düşünişmegiň ýokary derejesini aýratyn nygtadylar.
Iki tarap hem birek-bireg hormat goýmak we umumy bähbitlerine esaslanýan netijeli döwletara gatnaşyklaryň täze mazmun bilen baýlaşdyrylyp, mundan beýläk-de yzygiderli ösdüriljekdigine ynam bildirdiler.
ORIENT
